VIQUEQUE, 31 outubru 2023 (TATOLI)—Uma-kain hamutuk 200 iha suku Laline, postu Lacluta, munisípiu Viqueque, to’o agora seidauk asesu bee-moos hodi konsumu ba nesesidade loron-loron.
“Kada loron bainhira abitante sira hakarak konsumu bee, sira tenke la’o ba bee matan hodi bele kuru,” Xefe suku Laline, Jaquel dos Reis de Carvalho, informa ba Agência Tatoli, iha postu Lacluta, tersa ne’e.
Notísia relevante : Reprezentante povu husu Governu fo atensaun ba komunidade la asesu bee-moos
Maski nune’e, uma-kain 100 iha suku Laline daudaun asesu ona bee-moos, enkuantu 200 seluk seidauk tanba hela ho distánsia dook hosi bee matan.
“Abitante sira iha preokupasaun bee-moos ne’e iha kedan tinan 2019. Empreza Modelu Foun hetan kontratu hosi Governu atu halo kanalizasaun bee-moos, maibé to’o agora projetu dada bee-moos abandona. Tanba ne’e, ami husu ba parte relevante atu hodi buka tuir empreza ne’e hodi bele finaliza dada bee-moos,” nia hato’o.
Tuir dadus, suku Laline kompostu hosi suku lima hanesan Aimeti-Hun, Fatu-Kado, Mau-Ama, Mikradek no Santo António, ho totál populasaun 943 (sensu 2015).
Jornalista : Vitorino Lopes da Costa
Editora : Julia Chatarina
