VIQUEQUE, 02 novembru 2023 (TATOLI)—Padre Selebrante, Eman Pinto, husu família ida-idak tenke halo orsaun ba matebian ne’ebé klamar sei iha purgatóriu hodi Maromak fó perdaun.
“Loron 02 novembru igreja katólika koloka ba selebra loron matebian sira. Tanba ne’e, ha’u husu ba família ida-idak tenke halo orasaun ba ida-idak ninia matebian sira ne’ebé oras-ne’e klamar sei iha purgatóriu atu Maromak fó perdaun no klamar bele sa’e ba lalehan hodi hamutuk ho Maromak,” Padre Eman hateten iha ninia omília iha misa ba matebia nsira, iha kapela semitériu públiku Uailalika, kinta ne’e.
Notísia relevante : Família hotu tenke agradese ba memória di’ak ne’ebé matebian sira husik hela
Nia dehan, durante selebrasaun ne’e família sira lori ai-funan no lilin, ne’ebé ai-funan nu’udar símbolu pás, rekonsilasaun no domin ba matebian sira, maski sira mate ona, maibé nafatin hatudu respeita ba sira. Enkuantu, lilin nu’udár símbolu naroman atu leno ba matebian sira hodi la’o tuir roman ne’ebé sunu iha rate.
“Maski sira mate ona, maibé ita la lakon fiar ba sira, ita la haree sira-nia prezensa iha ita-nia oin tanba ita konsidera sira sei moris ho ita. Nune’e, ita kontinua halo rekonsiliasaun ho matebian sira. Símbolu lilin naroman sunu iha matebian nia rate atu leno dalan no ita-nia fuan moris espirituál, katak ita sente matebian sira sei moris hamutuk ho ita loron-loron,” nia akresenta.
Nia konsidera, maski família sira la haree klamar, maibé dala barak bainhira halo viajen ruma sempre husu matebian hodi akompaña tanba Maromak determina matebian sira hodi akompaña atu família labele hetan dezastre ruma.
“Dala barak ita halo viajen, rona ita sempre husu matebian hodi akompaña iha ita-nia viajen tanba Maromak determina ita-nia matebian sira atu akompaña ita, sira ne’e sai manu ain Maromak nian. Tanba ne’e, ita presiza respeita ita-nia matebian sira hodi akompaña,” nia hato’o.
Padre salienta, loron ida ita mós sei mate, nune’e tenke hasa’e nafatin orasaun ba Maromak.
“Loron ida ita sei mate, ho nune’e ita tenke hasa’e nafatin orasaun ba Maromak no matebian sira atu sira bele tulun ita labele hetan buat ruma no lori ita ba dalan susesu. Ai-funan no lilin ne’e ita lori ba rate hodi hametin ita-nia fraternidade familiár ho matebian sira,” Amu hameno.
Tuir observasaun Agência Tatoli iha terrenu, nota katak iha selebrasaun loron finadu ba matebian iha kapela Uailalika, família ida-idak hosi suku Uaitame lori ai-funan no lilin hodi hetan bensaun hosi Padre Parokia Uatulari molok kari iha rate.
Iha semitériu Uailali, maski rai manas, maibé família sira ho sentimentu domin sunu lilin, kari ai-funan no tau hahán sira iha rate nu’udar sentidu jantár hamutuk ho matebian sira. Enkuantu, situasaun iha semitériu ne’e la’o hakmatek.
Jornalista : Vitorino Lopes da Costa
Editora : Julia Chatarina
