iklan

ERMERA

Loron 03 novembru fó rekoñesimentu ba feto Timor-Leste nia luta

Loron 03 novembru fó rekoñesimentu ba feto Timor-Leste nia luta

Governu liuhosi Sekretária estadu Igualdade (SEI) komemora loron nasional feto iha tinan 2023 ne’e iha postu administrativu Letefoho, munisípiu Ermera, seta (03 novembru 2023). Imajen Tatoli/Osória Marques.

ERMERA, 03 novembru 2023 (TATOLI)–Sekretária Estadu ba Igualdade (SEI), Elvina Sousa Carvalho, hateten selebrasaun loron 03 novembru fó rekoñsimentu ba feto Timor-Leste nia luta ba Tmor-Leste nia indenpendénsia.

Notísia Relevante: Pe. Maubere: “Feto Maromak labele sai atan ba mane”

“Selebrasaun loron 03 novembru ne’e hanesan fó rekosementu ba eroina Maria Tapó tanba ho sira-nia kontribuisaun mak ohin loron ita hamutuk ho mane hetan indenpendensia ida-ne’e,” Elvina Sousa Carvalho hateten liuhosi diskursu iha kmemorasaun loron nasionál feto ne’ebé selebra iha postu administrativu Letefoho, munisípiu Ermera, sesta ne’e.

Governante ne’e hatutan, iha tempu funu ne’e feto Timor-Leste mós sakrifika sira-nia aan hodi luta kontra invazór Indonézia.

“Feto ne’ebé brani hasoru inimigu invazór sira mak ohin loron ita bele liberta aan, nune’e ita tenke fó onra ba ita-nia eroina sira liuliu Maria Tapó ho nia feto maluk sira, ne’ebé fó nia kontribuisaun tomak ba indenpendénsia ida-ne’e,” nia hateten.

Deputada hosi partidu CNRT, Bendita Magno, hateten komamorasaun loron nasionál feto ho tema feto pronto serbi ne’e importante ba jerasaun foun hodi kontinua banati tuir.

“Tema ohin ba loron nasionál feto Timor-Leste “feto prontu lidera pasadu, agora no future” ne’e importante tebes ba ita hodi transforma istória sira-ne’ebé ita-nia eroina sira husik hela mai ita. Entaun, sira hahú ona no ohin loron ita selebra no transforma fali ita-nia oan feto sira tanba sira mak futuru ba nasaun ida-ne’e nian, nune’e sira presiza hatene istória pasada feto envolve iha indenpendensia ida-ne’e nian,” nia hateten.

Tanba ne’e, nia nia husu ba Sekretária Estadu ba Igualdade atu tau orsamentu ba kapasitasaun formasaun ba feto, nune’e eleva sira-nia konesimentu tanba feto ho mane hamutuk mak bele lidera.

Xefe Suku Lauana, postu administrativu Letefoho, munisípiu Ermera, Miguel G. M. A. Imajen Tatoli/Osória Marques.

Xefe Suku Lauana, postu administrativu Letefoho, munisípiu Ermera, Miguel G. M. A, hateten ohin loron nasionál feto Timor-Leste maibé presiza kapasitasaun ba feto rurál liuliu Letefoho oan tanba sei menus kapasitasaun.

“Ita agradese tebes tanba Governu ohin loron deside hodi selebra ita-nia loron importante iha Letefoho ne’e, maibé presiza kapasitasaun hosi Governu liuliu Sekretária Estadu Igualdade atu eleva di’ak liután ita-nia inan feton sira-nia koñesimentu iha área rural, Tanba, ha’u observa katak iha Letefoho ne’e menus tebes formasaun hodi kapasita sira, nune’e ha’u nafatin husu SEI nia programa kapasitasaun ne’e,” nia rekomenda.

Autoridade komunitária ne’e dehan, atu feto iha mentalidade ne’ebé di’ak iha sosiedade mak presiza deseminasaun no sensibilizasaun informasaun liga ho asuntu feto nune’e feto mós  bele lidera.

“Ha’u hanesan autoridade lokál nafatin enkoraja no motiva feto iha suku liuhusi atividade oiaoin nune’e bele kapasita sira hodi hatudu katak feto mós bele lidera la’ós mane de’it maibé feto hamutuk ho mane mak bele lori sustentável dezenvolvimentu nasionál suku to’o aldeia,” nia hateten.

Istória lroon nasionál feto: 03 novembru 1975

Loron Nasionál Feto Timor-Leste nu’udar loron ida-ne’ebé importante tebes iha istória Timor-Leste nian. Loron ne’e hodi fó rekoñesimentu ba luta feto Timor-Leste sira iha rezisténsia nia laran, liuliu ba saudoza Maria Tapó.

Maria Tapó, eroína ida-ne’ebé husi Organizasaun Populár Feto Timorense (OPMT, sigla portugués) ne’ebé absorve polítika OPMT hodi luta ba dignidade feto no hasoru invazór militár Indonézia.

Maria Tapó moris iha Tapo, Munisípiu Bobonaro, feto iliterada no ema simples ida-ne’ebé sai hanesan figura ezemplár ida ba feto maluk sira no Primeira Eroína ba Luta ba Libertasaun Nasionál.

Molok Indonézia invade ofisialmente iha loron 7 fulan-dezembru tinan 1975, iha tiha ona infiltrasaun inimigu iha área fronteira. Iha tempu ne’ebá Forsa Armada Libertasaun Nasionál Timor-Leste (FALINTIL) halo kedas rezisténsia. Maria Tapó hanesan feto ida barani no feen ida ezemplár fó apoiu makaas tebes ba nia kaben iha liña de fogo.

Iha loron 3 fulan-novembru tinan 1975 bainhira nia kaben han hela, nia mak troka nia kaben hodi halo vijilánsia ho kilat iha liman, derrepente inimigu halo asaltu, haree ba situasaun hanesan ne’e Saudoza Maria Tapó ho aten barani foti asaun reziste hasoru inimigu, hafoin inimigu tiru makaas tebe-tebes hodi kona ita-nia feto maluk ne’e no nia mate kedas iha liña de fogo.

Hafoin nia mate, tuir sasin na’in-tolu hanesan Paulino Viegas Tilman, Domingos Mau no Santina Fernandes hato’o katak Maria Tapó, nia feto maluk sira seluk ne’ebé sira la’o hamutuk haruka kedas karta ba Comité Central FRETILIN (CCF) ho lian Portugés deklara nune’e: “Nos as Mulheres de Tapó não rendemos, nem renderemos, lutaremos até a nossa última gota de sangue.” Katak, “Ami feto Tapó sei la rende, ami sei la rende nafatin, ami sei funu nafatin, ami sei funu to’o ami-nia ran turuk ikus liu nian.”

Loron Nasionál Feto

Hafoin simu tiha karta ne’e, Primeiru-Ministru Repúblika Demokrátika Timor-Leste iha tempu ne’ebá, Saudozu Nicolau Lobato halo inisiativa iha ailaran iha tinan 1976 hodi deside loron 3 fulan-novembru sai nu’udar Loron Nasionál ba Feto.

Ho nune’e, iha tinan 1977 hosi Sorumutu Comité Central FRETILIN dekreta Rezolusaun ida ba loron 3 fulan-novembru sai nu’udar Loron Nasionál ba Feto Timor-Leste. Hahú hosi ne’ebá iha ailaran, tinan-tinan komemora Loron Nasionál ba Feto.

Liu tiha Restaurasaun Independénsia, iha tinan 2002, iha Kongresu Nasionál Feto Daruak, iha tinan 2004, ne’ebé hetan partisipasaun hosi organizasaun feto hotu-hotu iha Timor-Leste tomak, maluk feto sira ezije katak Timor-Leste tenke iha loron nasionál ba feto, atu fó valór no rekoñesimentu ba feto sira tanba sira mós fó kontribuisaun makaas ba Luta ba Libertasaun Nasionál hosi tinan 1975 to’o tinan 1999.

Ezijénsia ne’e sai hanesan plataforma hosi Kongresu Nasionál Feto Daruak no hato’o ba Parlamentu Nasionál hodi foti desizaun. Ikusmai Parlamentu Nasionál aseita no estabelese Lei Númeru 17/1/3/2005, ne’ebé deside loron 3 fulan-novembru sai nu’udar Loron Nasionál ba Feto Timor-Leste.

Iha tinan 2020 ne’e Timor-Leste liuhosi Sekretaria Estadu ba Igualdade no Inkluzaun Komemora Loron Nasionál Feto ba dala-45 ho tema “Promove Partisipasaun Feto iha Nivel Foti-Desizaun hodi Lidera ba Mudansa Inkluziva”. Komemorasaun ne’e shala’o iha suku Luro, postu administrativu Luro, munisípiu Lautemm iha loron 3 fulan-novembru.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!