iklan

ERMERA

Pe. Maubere: “Feto Maromak labele sai atan ba mane”

Pe. Maubere: “Feto Maromak labele sai atan ba mane”

Padre selebrante ba misa agradesimentu Loron Nasionál Feto, Pe. Domingos da Silva "Maubere", hato’o nia omilia iha selebraaun misa agradesimentu ba Loron Nasionál Feto iha igreja parokia Nosa Senhora do Carmo Letefoho, Ermera, sesta (03 novemvbru 2023). Imajen Tatoli.Osória Marques.

ERMERA, 03 novembru 2023 (TATOLI)—Padre selebrante ba misa agradesimentu Loron Nasionál Feto, Pe. Domingos da Silva “Maubere”, hateten loron nasionál feto ne’e tenke hatudu jéneru katak feto ho mane iha responsabilidade no hanoin ne’ebé hanesan iha atividade no desizaun hotu-hotu, tantu iha família no iha nasaun ida-ne’e.

Notísia Relevante: Loron nasionál feto sei komemora iha Ermera

Tanba, nia hatutan, feto ida no mane ida la’o mesak sei labele tanba ema ida mesak sei labele no feto ho mane ida moris hamutuk mak bele, nune’e husu ba feto sira tenke liberta-aan hosi todan no labele sai atan.

Padre selebrante sira preside misa agradesimentu ba Loron Nasionál Feto ne’ebé komemora iha igreja parokia Nosa Senhora do Carmo Letefoho, Ermera, sesta (03 novemvbru 2023). Imajen Tatoli/Osória Marques.

“Feto Maromak nia inan, entaun feto labele sai atan ba mane, atan ba oan no atan ba sanan, ne’e labele no sala. Feto tenke liberta-aan hosi todan sira. Tanba Maromak halo feto hodi tulun mane no Maromak mane, Maromak padre, feto mak filho no oan esperitu santu mak sai família santisima trindade nian.”  Amu Maubere hateten iha nia omília, iha igreja parokia Nosa Senhora do Carmo Letefoho, Ermera, sesta ne’e.

Tuir nia, loron feto nasionál sai onradu boot ida ba komunidade no Letefoho-oan hotu, tanba Governu fó fiar hodi selebra loron nasionál feto ba dahuluk iha postu administrativu Letefoho, munisípiu Ermera.

“Onra boot ba ita-nia inan feton sira nia loron nasionál ne’ebé selebra ba iha Letefoho. Nune’e, mai ita fó nafatin onra ba sira no agradese ba Governu hodi deside selebrasaun iha fatin ida-ne’e,” Amu Maubere hateten.

Pároku Igreja Nosa senhora do Carmo Letefoho, Hélio Pereira Fernandes, hateten liuhusi selebrasaun ida-ne’e bele promove mós beleza Letefoho ba mundu.

“Eventu nasionál ne’e, ha’u orgullu tebes tanba bele promove ona Letefoho nia di’ak, beleza nune’e agradese tebes ba Governu ida-ne’e.” pároku ne’e hateten.

Feto Potensiál Letefoho, munisípiu Ermera, Janen Gomes. Imajen Tatoli/Osória Marques.

Aleinde ne’e, Feto Potensiál Letefoho, munisípiu Ermera, Janen Gomes, hateten loron 03 novembru ne’e sai ona loron importante ba feto hotu-hotu hodi hatudu ba Timor-Leste katak feto mós bele no lidera, nune’e ohin loron sai loron feto nasionál.

“Ha’u hanesan feto Letefoho-oan sente kontente tanba Governu no Parlamentu Nasionál deside loron importante ida-ne’e sai loron feto nasionál no loron 03 novembru ne’e la’ós ona ita komemora de’it maibé sai loron feira nasionál,” nia dehan.

Tanba ne’e, nia husu ba Governu no Estadu ida-ne’e atu kontinua fó formasaun no kapasitasaun ba feto rural, nune’e bele lidera feto maluk iha atividade saida de’it tanba tema ne’ebé Governu deside iha loron feto nasionál ne’e katak  ‘A Mulher Pronta a Liderar, Antes, Agora e no Futuro’.

Tanbasá Governu hili 03 Novembru sai loron nasionál feto

Governu deside hili loron 03 novembru nu’udar loron nasionál feto, tanba loron nasionál feto Timor-Leste nu’udar loron ida atu fó rekoñesimentu ba feto Timor-Leste sira-nia luta iha rezisténsia nia laran liuliu ba saúdoza Maria Tapó.

Saudoza Maria Tapó nu’udar eroina ida-ne’ebé hosi Organizasaun Populár Feto Timorense (OPMT, sigla portugués) ne’ebé absorve politika OPMT hodi luta ba dignidade feto hasoru militár Indonézia.

Maria Tapó moris iha Tapó, munisípiu Bobonaro, feto iliterada no ema simples ida-ne’ebé sai hanesan figura ezemplár ida ba feto maluk sira no Primeira Eroina ba Luta Libertasaun Nasionál.

Tanba molok Indonézia invade ofisiálmente Timor-leste iha 07 dezembru 1975, iha tiha ona infiltrasaun inimigu iha área fronteira no iha tempu ne’ebá Forsa Armada Libertasaun Nasionál Timor-Leste (FALINTIL) halo kedas rezisténsia, nune’e Maria Tapó hanesan feto ida brani no feen ida ezemplár fó apoiu makaas tebes ba nia kaben iha liña de fogu.

Iha loron 03 Novembru tinan 1975, bainhira nia kaben han hela, Maria Tapó mak troka nia kaben hodi halo vijilánsia ho kilát iha liman. Bainhira halo hela vijilánsia derrepente inimigu halo asaltu, haree ba situasaun hanesan ne’e zaúdoza Maria Tapó ho aten bráni foti asaun reziste hasoru inimigu maibé tanba inimigu tiru-kona nia no nia mate kedas iha liña de fogu.

Hafoin nia mate, tuir sasin na’in-tolu (3), hanesan Paulino Viegas Tilman, Domingos Mau no Santina Fernandes hato’o katak Maria Tapó nia feto maluk sira seluk ne’ebé sira la’o hamutuk haruka kedas karta ba Comité Centrál FRETELIN ho lian portugés deklara nune’e, “Nós as Mulheres de Tapó não rendemos, nem renderemis, lutaremos até a nossa última gota de sangue– “Ami feto Tapó sei la rende, ami sei la rende nafatin, ami sei funu nafatin, ami sei funu to’o ami-nia raan turuk ikus nian”.

Hafoin simu tiha karta ne’e, Primeiru Ministru Repúblika Demokrátika Timor-Leste iha tempu ne’ebá, Saudozu Nicolau Lobato hala’o inisiativa iha ai-laran, iha tinan 1976 hodi deside loron 03 Novembru sai nu’udar Loron Nasionál ba Feto Timor-Leste.

Ho nune’e, iha tinan 1977 hosi sorumutu Comité Centrál FRETELIN dekreta Rezolusaun ida ba loron 03 fulan Novembru sai nu’udar Loron Nasionál ba feto Timor-Leste no hahú hosi ai-laran, tinan-tinan komemora Loron Nasionál ba Feto.

Hafoin Timor-Leste Restaura Independénsia iha tinan 2002, iha Kongresu Nasionál Feto daruak, ne’ebé partisipa hosi organizasaun feto hotu-hotu iha Timor-Leste, feto sira ezije katak Timor-Leste tenke iha loron nasionál ba feto atu fó valór no rekoñesimentu ba feto sira, tanba sira mós fó kontribuisaun makaas ba luta ba Libertasaun Nasionál hosi tinan 1975 to’o 1999.

Ezijénsia ne’e sai hanesan plataforma hosi Kongresu Nasionál Feto daruak no hato’o ba Parlamentu Nasionál hodi foti-desizaun. Ikus mai, Parlamentu Nasionál aseita no estabelese Lei Númeru 10/2005, 10 agostu, ne’ebé deside loron 03 fulan-Novembru sai nu’udar Loron Nasionál ba Feto Timor-Leste.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!