iklan

NASIONÁL, HEADLINE

Ministru Agio partisipa fórum illa pasífiku ba dala-52

Ministru Agio partisipa fórum illa pasífiku ba dala-52

Ministru Prezidénsia Konsellu Ministru, Agio Pereira, hamutuk ho delegasaun desloka ba illa Cook hodi partisipa fórum illa pasífiku ba dala-52. Imajen/Mídia PCM

DILI, 03 novembru 2023 (TATOLI)Ministru Prezidénsia Konsellu Ministru, Agio Pereira, reprezenta Primeiru-Ministru, Kay Rala Xanana Gusmão, sei partisipa iha fórum illa pasífiku ba dala-52, ne’ebé realiza iha Rarotonga, illa Cook.

“Loron 3 novembru 2023, Ministru Prezidénsia Konsellu Ministru desloka ba Illa Cook hodi partisipa iha sorumutuk líder fórum illa pasífiku nian ba da-52, ne’ebé sei hala’o hosi loron 06 to’o loron 10 novembru 2023 iha Rarotonga, Illa Cook,” refere nota ne’ebé Agência Tatoli asesu, sesta ne’e.

Notísia relevante : Partisipante AIS Forum komprometidu kria polítika ba mudansa klimátika

Fórum internasionál ne’e ho tema ‘Ami-nia lian, ami-nia eskolla, ami-nia maneira atu sai pasífiku-oan: promove, kooperativa, próspera.’

Fórum illa pasífiku nu’udar organizasaun rejionál ne’ebé halibur líder polítiku sira hosi nasaun oin-oin no territóriu illa sira iha rejiaun pasífiku, ho objetivu atu promove kooperasaun no diálogu entre nasaun no territóriu sira iha rejiaun pasífiku kona-ba asuntu komún sira hodi inklui asuntu polítiku, ekonómiku, sosiál no ambientál.

Fórum ne’e estabelese iha tinan 1971, kompoin hosi nasaun 18 ne’ebé sai hanesan membru plenu, nu’udar nasaun sira ne’ebé independente iha rejiaun pasífiku, nomós membru asosiadu no observadór sira, ne’ebé inklui nasaun no organizasaun sira ne’ebé hakarak kolabora no koopera ho rejiaun pasífiku.

Fórum ne’e inklui sekretariadu fórum illa pasífiku nian, ne’ebé fó apoiu administrativu no organizasionál ba atividade fórum nian.

Nasaun 18 ne’ebé nu’udar membru fórum illa pasífiku mak hanesan Austrália, Estadu Federadu Micronézia, Fiji, Illa Cook, Illa Marshall, Illa Salomão, Kiribati, Nauru, Nova Kaledónia, Nova Zelándia, Niue, Palau, Papua-Nova Guiné, Polinézia Franseza, Samoa, Tonga, Tuvalu no Vanuatu. Enkuantu Timor-Leste ho nia estatutu hanesan observadór iha fórum ne’e.

Jornalista     : Antónia Gusmão

Editora           : Julia Chatarina

iklan
iklan

Leave a Reply

iklan
error: Content is protected !!