iklan

BOBONARO, MUNISÍPIU, SEGURANSA

PNTL sei investiga ema na’in-hitu deskonfia envolve kazu Lourba-Karabau

PNTL sei investiga ema na’in-hitu deskonfia envolve kazu Lourba-Karabau

Komandante PNTL Munisípiu Bobonaro, Superintendente Xefe Polísia António Maria de Sá imajen Tatoli/Sérgio da Cruz.

BOBONARO, 04 novembru 2023 (TATOLI)Polísia Nasionál Timor-Leste (PNTL) munisípiu Bobonaro sei halo investigasaun ba ema na’in-hitu ne’ebé kanek hafoin asalta malu entre suku Lourba no suku Karabau, postu administrativu Bobonaro, ne’ebé akontese iha loron kinta (02/11) no sesta (03/11) ne’e.

“Suspeitu mak sira na’in hira vítima ne’e, tanba sira mak halo asaltu mai iha Lourba ninia, entaun Lourba uma 10 mak hetan sunu, uma tolu hetan estragu inklui kios rua,” Komandante PNTL munisípiu Bobonaro, Superintendente Xefe António de Sá, informa iha sede suku Lourba, sábadu ne’e.

Nia dehan, prosesu investigasaun ne’e sei hala’o hafoin vítima sira rekupera.

“Sira hamutuk na’in-hitu, na’in-tolu mak grave,  daudaun evakua ona bá Dili, na’in-ha’at seluk iha hela Sentru Klínika postu administrativu Bobonaro,” nia akresenta.

Notísia Relevante :PNTL no F-FDTL halo pasa revista iha área Lourba-Karabau

Nune’e, parte seksaun investigasaun mós kontinua halibur hela dadus, liu-liu uma ne’ebé hetan sunu, estragu, inklui sasán no animál.

Iha parte seluk, abitante sira hosi suku Lourba ne’ebé antes ne’e evakua bá fatin seguru hodi hetan seguransa, daudaun ne’e fila hotu ona bá ida-idak ninia rezidénsia.

“Horikalan ami iha ne’e hamutuk ho Prezidente Autoridade no Autoridade lokál sira, la’o tuir komunidade nia uma bá to’o Bobonaro hodi hateten ba sira atu sira labele tauk, pániku tanba situasaun seguransa normál fali ona,” Superintendente Xefe António de Sá, tenik.

Tuir observasaun Agênsia Tatoli iha terrenu, nota katak membru PNTL hamutuk ho Batalaun Orden Públiku (BOP), Unidade Espesiál Polisía no FALINTIL-Forsa Defeza Timor-Leste (F-FDTL) daudaun ne’e halo seguransa másima iha suku Lourba hodi garante pás no estabilidade ba populasaun.

Jornalista     : Sérgio da Cruz

Editora          : Julia Chatarina

iklan
iklan

Leave a Reply

iklan
error: Content is protected !!