BOBONARO, 04 novembru 2023 (TATOLI)—Polísia Nasionál Timor-Leste (PNTL) kompostu hosi Komandu Polisía Munisípiu Bobonaro, Batallaun Orden Públika (BOP) no Komandu Operasaun Espesiál hamutuk ho FALINTIL-Forsa Defeza Timor-Leste (F-FDTL), sábadu ne’e, halo pasa revista iha fatin konflitu ne’ebé baliza entre suku Lourba no suku Carabau, postu administrativu Bobonaro.
Membru responsável sira halo pasa revista ba transporte públiku no privadu ne’ebé hosi dirasaun suku sira ne’ebé pertense ba bairru iha Hauba atu viajen ba Maliana no Dili, atu haree karik lori sasán kro’at ruma, nune’e evita akontese problema ne’e iha fatin seluk.
“Imi kontinua serbisu tanba povu presiza hakmatek,” Sekretáriu Estadu Protesaun Sivíl, Domingos Mariano Reis, hateten ba autoridade seguransa no defeza iha terrenu.
Notísia Relevante : PNTL buka tuir suspeitu ne’ebé taa joven ida iha Lourba
Tuir observasaun jornalista Agência Tatoli iha terrenu, nota katak transporte motorizada no karreta hahú halo movimentu, inklui komunidade ne’ebé halai bá fatin seluk hahú fila ona ba ida-idak ninia rezidénsia tanba hetan seguransa másimu hosi PNTL no F-FDTL.
Parte seguransa no defeza kontinua halo patrullamentu tama sai uma iha área sira ne’ebé konsideradu risku ba konflitu, nune’e populasaun bele hakmatek no halo atividade.
Jornalista : Sérgio da Cruz
Editora : Julia Chatarina
