DILI, 03 novembru 2023 (TATOLI)- Polísia Nasionál Timor-Leste (PNTL) buka tuir hela suspeitu ne’ebé halo tentativa omisídiu liuhusi taa joven ida iha Lourba, iha loron finadu ne’e, ne’ebé halai lakon.
Komandante PNTL, Munisípiu Bobonaro, Superintendente Xefe, António de Sá, informa, PNTL Bobonaro buka tuir hela suspeitu ne’ebé taa vítima JS iha Suku Lourba, Postu Administrativu Maliana, Munisipu Bobonaro, iha kinta (02/11) horseik
“Kazu tentativu omesidiu ne’ebé akontese horseik iha suku Lourba ne’ebé iha joven ida hafoin tau ai-funan iha rate, nune’e fila, derepenti iha dalan hetan taa husi suspeitu oras ne’e dadaun kontinua buka tuir hela,” António de Sá hateten ba jornalista TATOLI via telefônika, sesta ne’e.
Autoridade polisiál ne’e relata, suspeitu ne’ebé envolve iha kazu ida ne’e, aman no oan. “Bainhira suspeitu nain rua ne’e halo tiha asaun violentu ne’e ami ba tuir kedan sira-nia uma atu asegura suspeitu na’in rua ne’e, maibé bainhira ami to’o uma, sira rua halai kedan ba iha Ainaro,” nia adianta.
Tanba ne’e, Komandu PNTL Bononaro halo ona kontaktu ho Komandu PNTL Ainaro hodi buka tuir suspeitu aman no oan ne’e hodi kaptura sira na’in rua hodi responsabiliza sira-nia hahalok ne’e.
Kona-ba vítima JS nia kondisaun, Superintendente Xefe, António de Sá, haktuir, vitíma oras ne’e daudaun sei halo hela tratamentu intensivu iha óspitál Maliana.
Notísia relevante:Joven ida hetan taa hosi ema deskoñesidu iha Lourbaeees
Jornalista: Natalino Costa
Editór: Rafael Ximenes de A. Belo
