Top

Projetu PDIM 2026 iha Bobonaru atinje progresu 49,43%

Diretór PDIM munisípiu Bobonaru, Rui Bere Mau Barros. Foto/Sergio da Cruz

BOBONARU, 16 Novembru 2026 (TATOLI)– Implementasaun projetu Programa Dezenvolvimentu Integradu Munisipál (PDIM) tinan 2026 iha munisípiu Bobonaru, ho pakote 22, atinje ona progresu fíziku 49,43%, no autoridade munisipál kontinua intensifika monitorizasaun hodi asegura kada projetu sira bele atinje meta 60% antes tinan ne’e remata.

Diretór PDIM Autoridade Munisipál Bobonaru, Rui Bere Mau, esplika katak husi projetu 22, iha balun ne’ebé enfrenta atrazu, inklui konstrusaun merkadu Mau-Mali, eskola ida iha Saburai no Postu Saúde iha Tapó.

“Projetu ida atraza ne’e mak merkadu Mau-mali tanba uma ne’e mós boot, depois eskola ida iha Saburai, más agora blok sa’e hotu ona, hein fui sinta leten para monta ona kuda-kuda. Ida mós iha Postu Saúde iha Tapó”, nia reitera ba jornalista sira, ohin.

Problema atrazu ne’e akontese tanba empreza balun kaer projetu rua to’o tolu iha tempu hanesan, ne’ebé halo traballadór sira hein materiál konstrusaun no afeta progresu implementasaun.

Notísia relevante: Projetu PDIM pakote 22 iha Bobonaru atinje 30%

Maski nune’e, nia afirma katak projetu 20 seluk sei bele atinje progresu liu 60% antes Dezembru, no baln  iha oportunidade atu finaliza 100% iha tinan ida-ne’e, inklui projetu bee-moos sira.

Atu responde ba situasaun ne’e, Diretór PDIM hamutuk ho tékniku no enjeñeiru sira kontinua halo monitorizasaun no kontrolu loroloron iha fatin projetu, inklui fó orientasaun ba empreza sira atu aumenta traballadór no aselera serbisu konstrusaun ho kualidade.

“Objetivu mak atu projetu sira bele finaliza tuir kalendáriu iha tinan 2026. Ami esforsu loroloron, orienta enjeñeiru sira atu fó instrusaun ba diretór kompañia sira, hodi haruka sira-nia traballadór halo serbisu lalais no ho di’ak”, nia dehan.

Rui Bere mós husu ba empreza implementadora sira atu kumpre responsabilidade kontratuál no aumenta esforsu, hodi garante katak projetu sira bele la’o tuir planu no fó benefísiu ba komunidade iha munisípiu Bobonaru.

Enkuantu, pakote projetu 22 ne’e, setór saúde iha tolu, edukasaun lima, agrikultura rua no infraestrutura 12 ho totál orsamentu $2.750. 460.

Notísia relevante: Konkursu públiku ba projetu PDIM 2026 iha Bobonaru tenke imparsiál

Jornalista: Sergio da Cruz

Editora: Maria Auxiliadora

 

Publisidade

Leave a Reply

Latest Post

error: Content is protected !!