VIQUEQUE, 06 novembru 2023 (TATOLI)—Autoridade munisípiu Viqueque, Januário Soares ‘Bolly’, segunda ne’e, apela ba abitante sira iha munisípiu Viqueque tomak atu dada sa’e bandeira nasionál iha uma oin, iha ámbitu komemorasaun loron proklamasaun independénsia 28 novembru ba dala-48.
“Husu ba abitante Viqueque tomak, uma-kain ida-idak atu dada bandeira nasionál iha uma oin hahú iha loron 10 to’o 30 novembru atu ita fó onra ba ita-nia eroi sira ne’ebé maka oferese sira-an ba rai Timor-Leste,” Administradór hateten hafoin enkontru preparasaun ba loron proklamasaun independénsia 28 novembru, iha salaun administrasaun munisipál, segunda ne’e.
Aleinde ne’e, nia husu abitante ida-idak atu halo limpeza iha uma oin, aldeia no suku, enkuantu komersiante sira hanesan loja no restaurante sira tenke pinta no halo dekorasaun ba ida-idak nia edifísiu oin.
“Ha’u husu mós ba setór privadu sira iha munisípiu, bainhira pinta iha edifísiu ruma tenke pinta ho di’ak no halo dekorasaun ba ida-idak ninia edifísiu oin, ida-ne’e ita tenke tau ba konsiderasaun iha ámbitu komemorasaun loron proklamasaun independénsia,” nia fó hanoin.
Notísia relevante : Governu aloka rihun $350 komemora loron proklamasaun independénsia ba dala-48
Ekipa responsável hosi administrasaun munisípiu Viqueque sei organiza atividade tolu hanesan misa iha loron 27 outubru, isar bandeira iha loron komemorasaun loron nasionál no fó pose ba líder komunitária sira kompostu hosi Xefe suku no aldeia.
“Komemorasaun ne’e sei realiza iha postu administrativu lima, nune’e ohin ami delega ona diretór munisípiu na’in-lima atu ba hamutuk postu hodi reprezenta munisípiu organiza eventu komemorasaun no tomada de pose órgaun suku,” nia informa.
Munisípiu Viqueque sei aloka orsamentu ba postu lima hodi realiza serimónia komemorasaun no tomada pose ba órgaun suku.
“Kada tinan ami aloka orsamentu ba komemorasaun loron nasionál ne’e, tinan ne’e osan ba komemorasaun aumenta, tanba ne’e hau’u sei koordena ho diretór finansa lai hafoin fó sai ba públiku,” Administradór tenik.
Atividade ne’e partisipa hosi sekretáriu munisípiu, segundu Komadante Polísia Nasionál Timor Leste (PNTL) Viqueque inklui diretór servisu munisipál liña ministeriál sira.
Jornalista : Vitorino Lopes da Costa
Editora : Julia Chatarina
