REINO UNIDU, 06 novembru 2023 (TATOLI)– Eminénsia Dom Virgílio Cardeal do Carmo da Silva, daudaun ne’e hala’o hela vizita pastorál durante semana ida ba Timoroan sira ne’ebé oras ne’e serbisu iha Londrés, Reinu Unidu no Irlanda Norte.
Dom Virgílio Cardeal do Carmo da Silva, hala’o ninia vizita ba embaixada Timor-Leste iha Londrés no Timoroan sira iha Inglatera hahú ona iha loron 03 to’o 14 fulan-novembru 2023.
Vizita pastorál ne’e hetan apoiu hosi Embaixada Timor-Leste iha Londrés. Nune’e, Dom Virgílio Cardeal do Carmo da Silva, to’o iha Aeroportu Stansted iha loron 03 fulan-novembru ne’ebé simu diretamente hosi embaixadór Timor-Leste iha Reinu Unidu, João Paulo Rangel no xefe komunidade Timoroan sira iha Peterborough, Bristol, Bridgwater, Winsford, Cambridge no xefe liturjia hosi sidade Oxford.
“Ha’u Sai hosi Timor besik fulan rua ona tuir sinode iha Roma. Maibé, tanba Timoroan iha Reino Unidu, ha’u mai iha UK tanba simu konvite husi líder komunidade balun ne’ebé iha fulan-jullu ba to’o Timor akompaña mós embaxadór João. Ha’u agradese tebes ba ita-bo’ot sira hotu tanba iha kontaktu ida di’ak entre ita-bo’ot sira ho família iha Timor no Igreja Timor,” hateten Dom Cardeal Virgilio, iha UK, tuir komunikadu ida ba Tatoli, ohin.
Iha biban hanesan, Embaxadór Timor-Leste iha Reinu Unidu, João Paulo Rangel, orgullu ho prezensa Amu Cardeal nian iha Reinu Unidu tanba ita-nia fiar iha Kristu no fiar nu’udar sarani Katólika.
“Pela primeira vez iha istória Igreja Katólika Timór, ita-nia Cardeal Dom Virgílio halo vizita mai maun-alin inan-feton sira iha Reino Unido. Tanba ita-nia fiar iha Kristu, fiar iha igreja Katolika, ita hotu-hotu hato’o bem-vindo ba Dom Cardeal Virgílio hodi vizita ita hotu iha Reino Unidu,” Embaixadór, João Paulo Rangel hateten.
Nune’e mós Prezidente Komunidade Timoroan iha Peterborough Celso Oliveira, hateten vizita ne’e baseia ba pedidu hosi komunidade Timoroan sira-nian iha Reino Unidu.
“Ida ne’e vizita istórika tebes. Ha’u hamutuk ho Ebiliza (Xefe Komunidade Bridgwater) no Roy Setiawan (Xefe Komunidade TAIS) hola parte iha delegasaun ne’ebé lidera hosi Embaixadór RDTL Londrés, Sr, João Paulo ba hasoru Dom Cardeal iha Lecidere iha fulan- jullu hodi hato’o pedidu vizita mai Timoroan iha UK. Ne’e duni, ha’u iha esperansa katak vizita ida ne’e sei lori rezultadu di’ak kona-ba aban bainrua padre Timór bele hela no servisu iha Reino Unidu,” Celso Oliveira, informa.
Tuir kalendáriu Dom Virgílio Cardeal do Carmo da Silva hasoru malu ona ho Archbishop of Westminter and President of the Catholic Bishop’s Conference of England and Wales Cardeal Vincent Nichols iha loron 04 fulan-novembru dadeer, no mós halo ona vizita iha sidade Oxford iha loron 4 to’o 5.
No, iha loron 6 fulan-novembru sei vizita bá sidade Crewe, tuirmai Winsford iha loron 07, no iha loron 8 fulan hanesan sei halo vizita bá Timoroan sira ne’ebé hela iha Schunthorpe, iha loron 09 fulan-novembru iha Cambridge, loron 10 iha Peterborough, iha loron 11 fulan-novembru sei vizita bá Bridgwater ho Bristol, no iha loron 12 to’o 13 fulan-novembru sei vizita bá Timoroan sira ne’ebé hela iha Irlanda Norte no loron 14 fulan-novembru sei fila fali bá Roma hodi tuir Sinode Bispu sira nian.
TATOLI, I.P
