DILI, 06 novembru 2023 (TATOLI)—Komisaun liuhosi ekipa konjunta kompostu hosi tékniku Komisaun Funsaun Públika (KFP) no Ministériu Edukasaun halo hela melloramentu hodi halo pagamentu subsídiu transporte ba profesór hotu inklui ba profesór sira ne’ebé okupa kargu diresaun xefia.
“Halo pagamentu subsídiu transporte ba profesór hotu no pagamentu subsídiu ba profesór sira ne’ebé mak okupa kargu diresaun xefia iha eskola sira, ho estrutura subsídiu ne’ebé di’ak liu kompara ho tinan sira kotuk, tanba tinan kotuk bazeia ba pakote, ne’ebé subsídiu depende ba númeru estudante, no depende ba diretór ka adjuntu ne’e nia mandatu tinan hira ona,” Prezidente KFP, Faustino Cardoso, relata hafoin hamutuk ho ekipa halo aprezentasaun orsamentu ba Komité Revizaun Orsamentu (KRO), iha auditóriu Ministériu Finansa, Aitarak-laran, segunda ne’e.
Notísia relevante : Profesór kontratadu 4.019 sei tama iha ingresu espesiál
Nia garante katak, iha tempu badak komisaun halo pagamentu subsídiu tanba prosesu besik konklui ona.
“Orsamentu ne’e Ministériu Edukasaun nian la’ós KFP,” nia akresenta.
Komisaun Funsaun Publika serbisu hamutuk ho Ministériu Edukasaun no iha ona ekipa tékniku konjunta ida, no despasu konjuntu ida atu hodi implementa dekretu-lei númeru 31/2023 ne’ebé asegura ingresaun espesiál ba profesór sira ne’ebé uluk kontratadu ne’e tama iha rejime espesiál nu’udar profesór.
“Agora prosesu la’o hela, ba sira ne’ebé la prienxe rekezitu, hein prosesu tuir fali mai maibé iha ona dalan atu ingresa espesiál ba rejime espesiál nu’udar profesór goza saláriu konforme rejime espesiál mensiona,” nia tenik.
Jornalista : Antónia Gusmão
Editora : Julia Chatarina
