DILI, 06 novembru 2023 (TATOLI)—Komisaun Funsaun Públika (KFP) iha prioridade ba tinan 2024, ne’ebé hakarak moderniza sistema, tanba daudaun aposta maka’as ba investimentu infraestrutura oinsá viabiliza realizasaun sistema dijitalizasaun administrasaun públika.
“Daudaun hahú ona teste promosaun ne’ebé sempre hala’o kada tinan, ne’e la’ós de’it nível nasionál maibé ba mós funsionáriu sira ne’ebé hala’o hela misaun diplomátika iha rai-li’ur liuhosi teste online. Enkuantu iha tinan 2024 teste online ne’e sei alarga to’o munisípiu sira liuhosi halo rejionalizasaun bainhira kondisaun permite,” Prezidente KFP, Faustino Cardoso, relata hafoin hamutuk ho ekipa halo aprezentasaun orsamentu ba Komité Revizaun Orsamentu (KRO), iha auditóriu Ministériu Finansa, Aitarak-laran, segunda ne’e.
Aleinde ne’e, KFP aposta maka’as atu realiza interligasaun sistema baze dadus entre KFP, Ministériu Finansa, Banku Sentrál Timor-Leste (BCTL, sigla portugés), no planeia to’o ministériu sira ida-idak no banku komersiál sira seluk.
“Inisiativa ne’e ho intensaun atu evita iha funsionáriu ‘mate-klamar’, katak mate tiha ona maibé sei simu hela saláriu. Aleinde ne’e atu evita mós dala balun funsionáriu balun simu dupla saláriu, ida-ne’e akontese duni tanba ita-nia sistema ne’e seidauk sufistikadu,” nia esplika.
Notísia relevante : KFP husu PN inísia lejislasaun reforma obrigatória ba funsionáriu públiku
Planu prioridade seluk, KFP kontinua halo konsolidasaun ba estrutura administrasaun públika nian, tanba Governu ida ba Governu seluk sempre iha estrutura foun, dala balun estrutura orgánika Governu mai ho ajustamentu balun tanba estrutura balun lakon no hamosu foun.
Tanba ne’e, KFP halo serbisu ne’e hodi konsolida, ajusta no atualiza iha sistema baze dadus, iha tempu hanesan atu simu mós forsa traballu resin sira ne’ebé mak mai hosi instituisaun sira ne’ebé lakon no órgaun sira ne’ebé la presiza ona funsionáriu barak, nune’e bele rekoloka ba ministériu orijen.
Nune’e, Komisaun iha hanoin iha tinan 2024 hamosu proposta dekretu-lei foun kona-ba planeamentu forsa traballu hodi nune’e Estadu bele iha instrumentu ida hodi kontrola aumentu forsa traballu tanba bainhira la kontrola Estadu bele lakon ninia mekanizmu ida atu asegura sustetabilidade finanseiru.
Tenke iha sistema kontratu ba ema kontratadu sira ne’ebé uniforme hosi ministériu sira tenke aplika sistema ida hanesan, la’ós hanesan agora ida-idak aplika tuir hakarak no versaun ida-idak ninian.
“Klaru katak Komisaun Funsaun Públika buka atu hadi’a avaliasaun dezempeñu ne’ebé komisaun haruka ona proposta kona-ba lista ba proposta lejizlasaun sira foun, nune’e mós sira ne’ebé tama kategoria halo alterasaun,” nia subliña.
Entretantu, KRO ne’ebé prezide hosi Primeiru-Ministru, Kay Rala Xanana Gusmão, aprova orsamentu KFP ba tinan 2024 ho montante millaun $3-resin.
“Ami hetan oportunidade hodi hato’o ami-nia orsamentu ba tinan 2024, ami simu pakote fiskál hosi Ministériu Finansa ho totál millaun $3-resin. Ami la husu adisionál, hafoin simu pakote fiskál ne’e ami halo ezersísiu tuir planu ne’ebé mak iha ho montante ne’ebé mak atribui, tanba laiha adisionál entaun KRO aprova tiha lalais de’it,” nia tenik.
Jornalista : Antónia Gusmão
Editora : Julia Chatarina
