Kualidade foos marka ‘’Amor de Família’ hein rezultadu teste iha laboratóriu
DILI, 06 novembru 2023 (TATOLI)—Ministru Komérsiu Indústria (MKI), Filipus Nino Perreira, hateten kona-ba kualidade foos ho marka ‘Amor de Família’’ agora hein de’it rezultadu teste iha laboratóriu.
Notísia Relevante: AIFAESA foti ona amostra foos marka “Amor de Familia” bá teste kualidade
“Parte Governu foti ona amosta liuhusi AIFAESA atu ba teste iha laboratóriu iha Indonézia, nune’e hein rezultadu teste,” Ministru Nino Pereira hateten ba jornalista sira hafoin halo interpelasaun ho Parlamentu Nasionál (PN), segunda ne’e.
Iha interpelasaun ne’e, Deputadu sira liuliu bankada opozisaun preokupa ho kualidade distribuisaun foos hosi empreza sira-ne’ebé hetan subsídiu hosi Governu, enkuantu hosi bankada Governu liuliu Deputadu CNRT hato’o katak foos ne’e iha kualidade konsumu di’ak hela,
Mezmu nune’e, Governante ne’e hateten foos ne’e di’ak ba konsumu tanba ema barak no inklui ministru arsik mós konsumu foos refere.
“Kona-ba kualidade foos Amor de Família, ohin, Deputadu balun mós dehan sira mós konsumu kualidade di’ak no ha’u rasik Ministru Komérsiu Indústria, ami mós konsumu foos Amor de Família. Tanba, foos ne’ebé ita temi foos ne’ebé nutritivu no foos ne’ebé ba sira karik moras diabete bele han foos ne’e ninia kadar gula ne’e tun, no sira-ne’ebé tuir dieta ne’e di’ak-liu han etu hosi foos ne’e,” nia hateten.
Ne’ebé, nai dehan, foos ne’e ninia kualidade di’ak tanba koñese ho kompetisaun iha merkadu ne’e ema balun gosta no balun la gosta.
“Uluk mós ita deskonfia foos ida marka ho manu vitória dehan, kualidade laiha. Maibé, depois halo teste foos ne’e mak hanesan ne’eduni, nia rezultadu negative. Katak, kualidade di’ak bele konsumu hanesan mós ho foos agora Armor de Família. Tanba, foos ne’e la’ós foos baibain foos ne’ebé la presiza halo fumigasaun ninia durasaun bainhira ita konsumu ne’e kleur no la iis. Ita dehan, se kompañia mak halo distribuisaun foos ne’ebé laiha kualidade, ita sei foti sansaun bazeia ba rezultadu ne’ebé iha,” nia dehan.
Jornalista : Nelson de Sousa
Editór : Cancio Ximenes
