Aldeia hitu iha TL sei avansa ba eleisaun suku terseira ronda

DILI, 07 novembru 2023 (TATOLI)–Diretór Jerál Sekratariadu Tékniku Administrasaun Eleitorál (STAE), Acilino Manuel Branco, hateten rezultadu eleisaun suku primeiru ronda ne’ebé realiza iha 28 outubru liubá ne’e, iha aldeia barak mak hakat ba segunda volta maibé iha aldeia hitu ninia votu empata.
Notísia Relevante: STAE prepara buletin votu 600.000 ba eleisaun suku segunda volta
“Aldeia ne’ebé mak votu empata ne’e aldeia ida iha munisípiu Covalima, ida tan iha Ermera ho ida seluk iha Lautém, Manufahi ida no RAEOA ida no mós Viqueque iha rua. Aldeia hirak ne’ e sei avansa ba eleisaun suku hili xefe aldeia ba terseiru ronda,” Acilino Manuel Branco, dehan ba Agência Tatoli, iha nia knar fatin Caicoli, Dili, tersa ne’e.
Diretór Jerál ne’e esplika, hakat ba terseira volta iha eleisaun suku ba hili xefe aldeia aldeia nian ne’e hein desizaun hosi Governu liuhosi Ministériu Administrasaun Estatál (MAE).
“Ida-ne’e ita sei hein desizaun Governu mak deside, tanba MAE mak dekreta data ba eleisaun ne’e. Ita komunika ona MAE kona-ba asuntu ne’e, no ita hein desizaun depois mak ita halo adaptasaun hodi fó apoiu ba sira, eintermu lojistiku no formasaun liga ho prosesu eleisaun,” nia dehan.
Iha aldeia hitu (7) ne’e, nia dehan, kada aldeia iha ema na’in-rua mak hakat ba eleisaun suku hili xefe aldeia ba terseira volta.
Jornalista : Osória Marques
Editór : Cancio Ximenes

