STAE prepara buletin votu 600.000 ba eleisaun suku segunda volta
DILI, 07 novembru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE prepara buletin votu ba eleisaun suku segunda volta nian hamutuk 500.000 to’o 600.000.
Notísia Relevante: Kandidatu xefe suku iha territóriu nasionál hamutuk 2.117
“Ita prodús hikas buletin votu ba segunda volta nian no oras ne’e daudaun produsaun la’o hela. Tuir planu, ita sei prodús metade hosi buletin votu iha primeira volta nian. Signifika ita sei prodús 500.000 to’o 600.000 ba kandidatu xefe suku sira iha suku 271 hosi totál suku hamutuk 442 iha TL,” Acilino Manuel Branco hateten ba Agência Tatoli, iha nia knar fatin Caicoli, Dili, tersa ne’e.
Repsonsável ne’e hatutan, hosi kandidatu xefe suku ne’ebé avansa ba segunda volta nian ne’e xefe suku eleitu iha 191 ho nia xefe aldeia hamutuk 2.000-resin no delegadu delegada sira besik 5.000.
Nune’e, hein eleisaun segunda volta nian bainhira iha ona eleitu mak Governu liuhosi Ministériu Administrasaun Estatál sei fó pose tuir kalendáriu ne’ebé Governu deside iha 28 novembru 2023.
Tuir loloos, nia hateten, ida-ne’e Ministériu Administrasaun Estatál (MAE) mak iha kompeténsia tanba Sekretariadu Tékniku Administrasaun Eleitorál (STAE) apoia iha parte tékniku de’it.
Tanba, tuir nia, lei númeru 9/2016, iha artigu 96 hateten katak órgaun eleitorál hanesan STAE fó apoiu lojistiku no formasaun ba eleitór sira no membru konsellu suku sira.
“Lei númeru 9/2016, aritgu 96 katak ami fó ami-nia apoiu no sentidu hodi oinsá mak bele tulun, hamutuk ho autoridade munisípiu sira no postu atu tulun meza eleitorál iha aldeia sira. Dala ida tan realiza hikas votasaun iha nivel aldeia ida-idak ba kandidatu xefe suku ne’ebé mak la liu iha sistema 50+1, iha eleisaun primeira volta ne’ebé akontese tiha ona iha 28 outubru,” nia dehan.
Kona-ba prosedimentu, nia dehan, la’o hanesan ho eleisaun antes ne’e katak iha loron 13 novembru iha aldeia ida-ida sei tuir hikas votasaun iha tuku 09h00-15h00.
Mezmu nune’e, hakarak hato’o hela ba eleitór sira katak bainhira to’o ona tuku 15h00 mak eleitór sira forma hela hela liña laran ne’e, sei admite hodi kontinua ezerse sira-nia direitu votu to’o ramata.
Tanba ne’e, husu ba eleitór hotu-hotu iha suku 271 iha territóriu nasionál atu prepara-aan hodi hakat tan dala ida ba sentru votasaun, hodi hili kandidatu ne’ebé merese atu sai xefe suku ba imi-nia suku rasik.
Maibé, nia husu ba eleitór sira atu lori ho kartaun eleitorál no iha prosesu eleisaun ne’e sei simu de’it buletin votu ida ho kór mutin.
“Signifika ne’e fasil hodi ita-boot sira vota no sei hotu lalais tanba buletin ida de’it ona tanba xefe aldeia eleitu hotu ona,” nia hateten.
Notísia Relevante: Kandidatu xefe suku provizóriu 251 sei avansa ba eleisaun segunda ronda
Jornalista : Osória Marques
Editór : Cancio Ximenes
