EDTL, E.P husu empreza implementadór aselera projetu ongoin liña eletrisidade iha Dili

DILI, 07 novembru 2023 (TATOLI)—Eletricidade de Timor-Leste, Empresa Públika (EDTL, E.P) liuhosi Komisaun Ezekutiva, hala’o enkontru ho na’in ba empreza sira ne’ebé implementa projetu ongoin liña eletrisidade.

Empreza sira ne’e toma konta ba projetu New Installation MV, LV Line and House Connection iha liña Feeder 1, Feeder 2, Feeder 3, Feeder 4, Feeder 5 no Feeder 6 iha kapitál Dili, ne’ebé kuaze tinan lima-resin ona seidauk finaliza óbra.

“Apela ba jestór empreza sira hodi halo revizaun ba kalendáriu serbisu no mobiliza tékniku sira hodi finaliza lalais obra refere iha fin tinan ne’e,” Komisáriu Ezekutivu Serbisu Tékniku EDTL, Latino Jerónimo, bolu atensaun ba empreza hanesan haktuir iha nota ne’ebé Agência Tatoli asesu, tersa ne’e.

Notísia relevante : EDTL, E.P rejistu kliente 22 halo ligasaun ilegál ba liña eletrisidade

Aleinde ne’e, Komisáriu Ezekutivu Serbisu Korporativu, Júlio de Jesus Gonçalves, alerta katak EDTL, E.P sei hapara kontratu serbisu ho empreza sira ne’ebé la kumpre tempu ne’ebé determina ona.

“Empreza sira ne’e sei hapara tanba durasaun ba obra ne’ebé sira kaer kleur tebes ona,” nia afirma.

Empreza ne’ebé implementa projetu ongoin New Installation MV, LV Line and House Connection iha ha kapitál Dili hanesan liña feeder 1 kaer hosi empreza Embi Electric, Unip Lda, Sonalevi Unip lda, feeder 2 hosi empreza Darren Construction Unip Lda., Ceulaiju Unip Lda. no Jmindo Unip Lda, feeder 3 hosi empreza Ladamutu Unip Lda, feeder 4 hosi empreza Anilca Unip Lda, feeder 5 hosi empreza Cartilo Unip Lda, Joia Leste Unip Lda, no feeder 6 hosi empreza Inajizu Unip Lda, Ferrajota Unip Lda, no Silkar Unip Lda.

Jornalista     : Antónia Gusmão

Editora          : Julia Chatarina