DILI, 07 novembru 2023 (TATOLI) – Ministériu Edukasaun (ME) liuhusi Gabinete Lisensiamentu, Avaliasaun no Akreditasaun fó ona lisensiamentu operasionál ba eskola foun hamutuk 18 iha tinan ida ne’e hodi hala’o sira-nian atividade ensinu aprendizajen.
Koordenadór Gabinete Lisensiamentu, Avaliasaun no Akreditasaun, António Tomás Maia, informa katak, iha 2023, pedidu lisensiamentu hamutuk 44 mak tama no ministériu avalia no define eskola 18 mak hetan konsiderasaun tanba prienxe ona rekizitu sira.
“Ita simu ona prosesu rejistrasaun ba eskola foun hamutuk 44. Husi totál númeru eskola ne’ebé rejista, iha 21 maka pasa iha faze dahuluk, maibé depois halo fali verifikasaun faze daruak nian iha de’it eskola hamutuk 18 maka prienxe rekizitu no hetan ona lisensiamentu”, António Maio reitera ba Tatoli, iha Vila Verde, ohin.
Eskola 44 ne’ebé aprezenta nia pedidu ne’e kompostu husi Pré-Eskolár 20, Eskola Bázika 13, Eskola Sekundária 10 no Eskola Tékniku Vokasionál ida.
Ba estabelesimentu eskolár foun sira ne’ebé seidauk hetan lisensa ne’e sei iha tempu ba sira atu kompleta dokumentu, nune’e bele kandidata fali hodi hetan autorizasaun.
“Ba eskola sira iha territóriu nasionál ne’ebé hakarak rejista hodi hetan lisensiamentu bele submete sira-nian dokumentu, tanba kada tinan ita sempre loke oportunidade ba eskola sira”, adianta.
Eskola sira ne’ebé maka atu rejista hodi hetan lisensiamentu mak eskola públika no privada, eskola komunitária no eskola katólika nian.
Notísia relevante: Eskola 79 mak hetan ona lisensa operasionál hosi MEJD
Jornalista: Tomé Amado
Editora: Maria Auxiliadora
