DILI, 07 novembru 2023 (TATOLI)—Governu liuhosi Ministériu Solidariedade Sosiál no Inkluzaun (MSSI) tau ona iha planu orsamentu Estadu tinan 2024 hodi hasa’e subsídiu ba idozu sira iha territóriu nasionál.
Ministra Solidariedade Sosiál no Inkluzaun, Verónica das Dores, hateten, IX Governu konsidera idoza sira nu’udar eroi viva.
“Ministériu nia prioridade iha tinan 2024 maka ba eroi vivo ka eroi sira inklui ema ho difisiente. Sira ne’ebé ho kazu espesiál ne’e Governu tenke atende, ne’ebé sira nia osan ami hasa’e hosi $57 to’o $100,” Ministra Verónica informa hafoin hamutuk ho ekipa halo aprezentasaun orsamentu tinan 2024 ba Komité Revizaun Orsamentu (KRO), iha auditóriu Ministériu Finansa, Aitarak-laran, tersa ne’e.
Notísia relevante : “PR promulga programa IX Governu mak realiza pagamentu ba idozu-Invalidéz”
MSSI hetan pakote fiskál millaun $30 no aprezenta proposta adisionál millaun $17.
“Ami aprezenta duni proposta adisionál maibé retira filafali tanba osan ne’e husu atu finansia programa balun maibé programa ne’e Governu esklui tiha, entaun adisionál mós ami retira,” nia esplika.
Ministra klarifika katak, programa ne’ebé sei inklui seidauk bele fó sai ba públiku tanba sei deside hosi Konsellu Ministru.
“Ami husu adisonál hodi finansia programa lubuk ida maibé sukat fali kbiit ezekusaun tanba seidauk másimu, entaun ami hasai adisionál no mantein ho tetu ne’ebé ami simu,” nia tenik.
Tuir portál transparénsia iha tersa ne’e, taxa ezekusaun OJE 2023 MSSI nian atinje 64% ($9.446.267,46) hosi totál orsamentu $30.217.108.
Jornalista : Antónia Gusmão
Editora : Julia Chatarina
