DILI, 07 novembru 2023 (TATOLI)-–Ministériu Negósiu Estranjeiru no Kooperasaun (MNEK), lideradu hosi Vise-Ministra Asuntu ASEAN, Milena Maria da Costa Rangel, halo aprezentasaun orsamentu tinan 2024 ba Komité Revozaun Orsamentu (KRO).
“Bainhira halo ezersísiu ba orsamentu ne’ebé fó mai ministériu la to’o, tanba ne’e ami husu adisionál millaun $5 tanba Governu planeia ona atu loke tan Embaixada rua no Konsuladu ida, ne’ebé osan ne’e hodi finansia ba despeza sira,” governante ne’e informa hafoin hamutuk ho ekipa halo aprezentasaun orsamentu iha auditóriu Ministériu Finansa, Aitarak-laran, tersa ne’e.
Notísia relevante : Timoroan husu Governu destaka serbisu notariadu-futuru konsuladu iha Irlandia Norte
Durante aprezentasaun, ekipa MNEK konsege konvense KRO hodi proposta adisionál ne’e hetan aprovasaun.
Vise-Ministra dehan, objetivu loke tan reprezentasaun iha estranjeiru tanba bazeia ba nasaun nia interese. Embaixada rua ne’ebé planeia loke iha tinan 2024 mak ida iha Ângola no seluk iha Índia, no Konsuladu jerál ida iha Irlanda Norte.
Entretantu, MNEK hetan pakote fiskál 2024 ho montante millaun $30, atu tau prioridade ba fortalesementu institusionál inklui ezerse Timor-Leste nia polítika externa.
Jornalista : Antónia Gusmão
Editora : Julia Chatarina
