Timoroan husu Governu destaka serbisu notariadu-futuru konsuladu iha Irlandia Norte
DILI, 06 jullu 2023 (TATOLI)—Embaixadór Reinu Unidu, João Paulo da Costa Rangel, hateten timoroan ne’ebé hela no servisu iha Reinu Unidu husu IX Governu Konstitusionál atu destaka serbisu notariadu Timor-Leste no future konsuladu iha Irlandia Norte.
“Pedidu dahuluk ne’ebé komunidade timoroan sira iha Reinu Unidu no Irlandia Norte husu ba Governu foun lideradu aman ba nasaun Kay Rala Xanana Gusmão mak destakamentu permanente servisu notariadu ba Timor-Leste nia Embaixada no futuru konsoladu iha Irlandia Norte,” Embaixadór ne’e hateten ba jornalista sira, hafoin hasoru malu ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Nia hateten, prepara edifísiu di’ak ida iha Reinu Unidu no mós Irlandia Norte atu simu timoroan sira ba forma ho dignu hodi trata sira-nia dokumentu, tanba sira ajuda tebes Timor-Leste haruka osan mai hodi ajuda Estadu.
“Ho ida-ne’e ita husu atu Estadu bele kria kondisaun ida-ne’ebé di’ak bainhira timoroan sira ba trata sira-nia dokumentu, bele iha fatin ne’ebé di’ak, bele hein, bele tuur hodi trata, labele tuur iha estrada, iha malirin no udan nia-laran,” diplomata ne’e dehan.
Aleinde ne’e, husu mós atu loke konsuladu iha Irlandia Norte hodi fó servisu konsulár sira ne’ebé Estadu loke iha ne’ebá hodi tau matan ba timoroan sira, no destakamentu serbisu notariadu permanente iha reinu únidu prepara edifísiu di’ak ida iha Londres.
“Pedidu tolu ne’e, Prezidente Repúblika apoiu tebe-tebes no sei lori ida-ne’e ko’alia ho Governu foun nune’e Governu foun bele aprova. La’ós ida-ne’e de’it, ami mós ko’alia kona-ba Prezidente Repúblika nia vizita ba iha Reinu Unidu iha Novembru,” nia dehan.
Nia hateten, timoroan sira-ne’ebé iha Reinu Unidu no Irlandia Norte la bolu ona traballadór maibé komunidade timorense, tanba iha ne’ebá ema servisu baibain mós iha, profisionál, estudante, no ho kategória oioin iha ne’ebá.
Liuhosi sistema inskrisaun konsulár ne’ebé embaixada sei monta, no oras ne’e daudaun tuir informasaun ne’ebé iha timoroan besik 30.000 mak moris iha ne’ebá.
“Tanba, timoroan besik 30.000 mak iha Reinu Unidu no Irlandia Norte. Ita husu, atu Estadu presta serbisu di’ak ba ita-nia komunidade timoroan sira, tanba sira ajuda tebes ita-nia rain ho remesas ne’ebé tama ita-nia rain loro-loron. Osan barak ne’ebé tama mai Timor, loro-loron mai hosi timoroan sira-ne’ebé servisu iha ne’ebá,” nia hateten.
Ho pedidu sira-ne’e, Prezidente Repúblika, Ramos Horta mós hakarak duni apoiu tebes no asegura katak pedidu komunidade timoroan sira-nian bele hetan resposta iha tempu badak.
“Tanba, komunidade timoroan sira iha ne’ebá hatene katak Estadu iha prióridade barak loos. Iha buat barak ne’ebé emerjénsia no importante loos, tanba-ne’e sira husu pedidu hirak ne’e ho haraik aan atu ita-nia Governu Timor Leste bele responde ho di’ak iha tempu badak. Se la responde no resolve dala ida de’it, pelumenus, neineik no tuir etapa,” nia hateten.
Prezidente Repúblika José Ramos Horta apoiu tebes pedidu hirak ne’e no admira tebes komunidade timoroan sira-ne’ebé servisu no hela iha Reinu Unidu tanba sira promove no kontribui tebes ho hamorin tebes Timor-Leste nia naran.
Husi 2003 to’o 2020, remesas ne’ebé komunidade timoroan sira haruka mai Timor sa’e hosi millaun $34-$150 no iha 2021 sa’e to’o millaun $170, no tuir kalkulasaun ne’ebé iha to’o tinan ne’e bele atinje millaun rua ($2).
Nune’e, hanesan reprezentate Estadu Timor-Leste iha Reinu Unidu nu’udar embaixadór, ohin, mai ho reprezentate líder sira komunidade Timoroan iha Reinu Unidu no Irlandia Norte hodi hato’o pedidu ba Estadu Timor-Leste, liuhosi Prezidente Repúblika depois Xefe Estadu bele kanaliza ba iha IX Governu Konstitusionál ne’e.
Jornalista : Osória Marques
Editór : Cancio Ximenes
