OÉ-CUSSE, 07 novembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, hato’o ona pedidu ba Komisaun Revizaun Orsamentu (KRO) husu osan adisionál $20,128,545 ho opsaun rua iha tetu Orsamentu Jerál Estadu (OJE) 2024.
Prezidente Autoridade RAEOA, Arsénio Paixão Bano, hateten, opsaun rua ne’ebé propoin iha Governu Sentrál, liuhosi KRO maka primeiru sei mantein tetu orsamentu RAEOA nian, iha defisit boot tebes no sei rezulta iha dívida ba administrasaun foun.
Segundu presiza aumenta osan iha tetu orsamentu hosi saldu jerénsia RAEOA nian $88,181.959, no husu Governu atu asegura pagamentu ba kontratu projetu plurianuál sira $5,096,696.04 iha Fundu Espesiál Dezenvolvimentu (FED).
Arsénio Paixão Bano, hateten, estrada nasionál hosi ponte Noefefan ba Oénunu, tama iha kategoria kapitál dezenvolvimentu, osan ne’ebé aprova hosi Komisaun Revisaun Orsamentu (KRO) iha tetu OJE 2024 $2,900,000, iha nia estimativa ne’e $6,086.869, entaun sei presiza-tán $3,186.869.
Hanesan mós estrada nasionál hosi Pante Makassar ba Oésilo tama kategoria kapitál dezenvolvimentu, osan ne’ebé aprova hosi KRO $3,700.000 iha nia estimativa ne’e $14,000.000, sei presiza-tán $10,300.000
Nune’e mós kombustível ba sentrál elétrika tama iha bens no servisu, osan ne’ebé aprova $4,192.440 iha nia estimativa ne’e $7,034.040, sei presiza-tán $2,841.600.
No mós veíkulu elétrika operasionál ba eeroportu tama iha kapitál menór, sei presiza-tán $307,400.00 no mós osan ba transferénsia sosiedade
“Ita presiza tán iha orsamentu FED nian hamutuk $20,128.545, ne’e ba kontinuasaun estrada nasionál ninian, kombustivel sentrál elétrika tanba Governu Sentrál fó ita iha tetu ne’e $4,192.440, nia kalkulasaun ne’e to’o de’it loron 200, signifika iha tinan ida iha loron 360, sei Governu Sentrál lá aumenta-tán osan, eletrika moris to’o de’it agostu, setembru to’o dezembru 2024 ahi mate tanba osan laiha,” Arsénio Bano, informa bainhira hala’o enkontru ofisiál ho setór privadu sira iha otél Ambeno Oé-Cusse, segunda ne’e.
Notísia relevante: RAEOA propoin millaun $93 iha tetu OJE 2024 atu konklui projetu 99
Arsénio Bano, argumenta, pedidu adiosionál atu husu ne’e, osan ne’e sei mai RAEOA nia osan saldu jerénsia $88,181,959.00, millaun $60 Governu Sentrál fó, ne’ebé proposta adisionál persiza $33,278,655.04.
“Tanba totál estimativa iha millaun $93,278,655.04, adisionál ba FED millaun $20,128,545.00, tan ne’e maka defise ka proposta aumentu transferensia hosi Governu Sentrál millaun $5,096,696.04,” nia katak.
Notísia relevante: Komisaun espesializada halo audiénsia públika ba proposta alterasaun lei kriasaun RAEOA
Jornalista: Abílio Elo Nini
Editór: Evaristo Soares Martins
