iklan

OEKUSI

RAEOA propoin millaun $93 iha tetu OJE 2024 atu konklui projetu 99

RAEOA propoin millaun $93 iha tetu OJE 2024 atu konklui projetu 99

Prezidente Autoridade Rejiaun Administrativa Espesiál Oe-Kussi, Ambeno (RAEOA), Arsénio Paixão Bano. Imajen Tatoli/Francisco Sony

OÉ-CUSSE, 26 outubru 2023 (TATOLI –  Autoridade Rejiaun Administrativa Espesiál Oé-Cusse Ambeno (RAEOA) propoin millaun $93 iha tetu Orsamentu Jerál Estadu (OJE) 2024 nian hodi kontinua finaliza projetu 99 daudaun la’o hela no projetu retensaun hamutuk 54 ne’ebé selebra ona kontratu iha 2022.

 “Osan ne’ebé ita propoin sei laiha projetu foun iha tinan oin, ita só kompleta de’it projetu sira-ne’e hotu, ita-nia osan husu atu aumenta tan to’o millaun $93 ne’e, atu selu de’it projetu sira-ne’ebé agora daudaun la’o hela atu halo hotu iha 2024, osan ne’e tantu ba FED no RAEOA nian,” Arsénio Paixão bano, ko’alia iha Oé-Cusse, kinta ne’e.

Notísia relevante: PN preokupa ezekusaun OJE 2023 iha Oé-Cusse foin atinje 43%

Prezidente Autoridade RAEOA, Arsénio Paixão Bano, hateten, RAEOA aprezenta ona tetu orsamentu 2024 nian iha Komite Revizaun Orsamentu (KRO) no prefere RAEOA nia tetu orsamentu ba tinan oin ne’e millaun $60, hodi fahe ba rua; millaun $20 ba Fundu Espesiál Dezenvolvimentu (FED) millaun $40 ba RAEOA nian.

Maibé tuir nia, osan ne’e tuun hosi orsamentu 2023, antes retifikativu RAEOA nia osan millaun $120, depois retifikasaun Governu Sentrál koa tiha millaun $36, hela millaun $84, maibé  ba tinan 2024  iha tetu orsamentu, RAEOA ninian tuun ba millaun $60.

“Entaun ha’u hanesan Prezidente Autoridade horseik ha’u ba aprezentasaun opsaun, katak RAEOA labele simu atu moris ho millaun $60 ne’e, tenke to’o millaun $100, tanba halo analiza haree hosi projetu hotu; iha tinan ne’e projetu 99 maioria sei hotu iha 2024, iha retensaun 54 RAEOA tenke selu hotu projetu sira-ne’e iha tinan oin,” nia afirma.

Autoridade másima RAEOA ne’e informa, iha ámbitu aprezentasaun orsamentu RAEOA nian ba KRO, Autoridade kontinua defende nafatin osan ba RAEOA nian, presiza Governu Sentrál aumenta.

“Ita-nia pedidu tomak ba orsamentu adisionál atu aumenta-tán ba tetu orsamentu ne’ebé iha, ne’e hamutuk millaun millaun $33 hodi sa’e ba millaun $93, ida-ne’e maka ita-bele kontinua obra sira-ne’ebé iha, para 2024 ita-bele halo,” nia akresenta.

Notísia relevante: PA RAEOA klarifika razaun ezekusaun OJE 2023 iha Oé-Cusse ki’ik

Arsénio Paixão Bano, konfirma, daurante ne’e Autoridade RAEOA halo ona buat barak, servisu ne’ebé halo hosi Obra Públika, edukasaun ho servisu tomak la’o, projetu barak no prgrama barak kontinua la’o.

Entretantu, kona-bá tetu orsamentu saldu jeresia RAEOA nian, daudaun ne’e iha, durante tinan ualu to’o 2023 ne’e, hela millaun $88.

“Ne’e osan terakhir ba tinan oin RAEOA nia osan rasik, 2025 ita tenki hetan tán osan ou autoridade foun mai buka tán osan nune’e bele kontinua fali obra sira iha Oé-Cusse,” nia tenik.

Nune’e, ezekutivu husu sasán hotu-hotu iha RAEOA, obra ne’ebé halo iha tinan hirak-nia laran tenke kuida sasán sira-ne’e, tanba iha 2024 sei laiha projetu foun,  maibé só konklui de’it projetu projetu 99 no projetu retensaun sira-ne’ebé halo iha 2023 ne’e.

“Tan ne’e maka ha’u husu ita hotu, haree no kuida projetu sira-ne’ebé iha, halo ho kualidade akompaña ho fiskalizasaun, tanba osan ne’ebé iha, sufisiente atu kompleta projetu hahú iha tinan ne’e, só iha 2025 RAEOA iha oportunidade hetan-tán orsamentu liu, ita sei halo tán projetu foun maibé iha 2024 osan terakhir maka daudaun millaun $88 ne’e,” nia fó hanoin.

 

Notísia relevante:Governu hahú ohin sesaun KRO ba OJE 2024

Jornalista: Abílio Elo Nini

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!