OÉ-CUSSE, 20 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, klarifika razaun ezekusaun Orsamentu Jerál Estadu (OJE) 2023 iha Rejiaun Administrativa Espesiál Oé-Cusse Ambeno (RAEOA) sei ki’ik tanba seidauk halo pagamentu ba projetu sira-ne’ebé konstrui ona iha rejiaun ne’e.
“Iha 2023 servisu barak ita tenke halo hotu, tanba Parlamentu Nasionál, mós mai hateten, RAEOA nia ezekusaun nível orsamentu nian ki’ik, maibé fíziku la’o lalais, foin daudaun ha’u laiha, maibé adjunta hatán, problema balu ne’e tanba iha sistema internete tanba iha servisu, maibé fíziku, durante ne’e ha’u halo fiskalizasaun ba obra sira, dalaruma iha problema mobilizasaun materiál, dalaruma ho traballadór, tanba Oé-Cusse iha obra barak, ezekusaun sei ki’ik tanba projetu sira barak sei halo pagamentu iha setembru to’o outubru ne’e tanba balu progresu sa’e ona,” Arsénio Bano ba jornalista sira iha Oé-Cusse, kuarta ne’e.
Notísia relevante: PN preokupa ezekusaun OJE 2023 iha Oé-Cusse foin atinje 43%
Nia informa, iha pasadu, ema barak diskute, Autoridade halo de’it dezenvolvimentu iha Pante Makasar, maibé tuir iha Pante Makasar, iha suku ualu (8) ho aldeia 17 ho nia populasaun hamutuk rihun 41, hanesan zona sentrál Oé-Cusse.
“Enatun ita tenke hadi’a uluk tanba ne’e zona sentrál Oé-Cusse, maibé dezde 2021 to’o 2023 ne’e, ita la ko’alia Pante Makasar de’it, ita dada ona ba sub-rejiaun sira,” nia informa.
Nia esplika, iha sub-rejiaun Pássabe suku Malelat, autoridade loke estrada, harii postu saúde no harii mós eskola iha fatin-fatin, hanesan mós ho suku sira seluk iha sub-rejiaun Nítibe, Oésilo projetu tama to’o suku, ne’ebé agora ko’alia ida de’it, dezenvolve Oé-Cusse, la’ós dezenvolve de’it Pante Makasar ka suku A ka B, maibé tenke dezenvolve Oé-Cusse.
“Maibé durante fulan-haat hosi setembru to’o dezembru molok tama ba 2024, ha’u hanoin ezekusaun sei sa’e maka’as, tanba ita haree ona, estrada nasionál rua, primeiru hosi Tono ba Oésilo servisu daudaun la’o hela,” nia katak.
“Daruak, hosi Ponte Noefefan ba Nítibe, servisu kontinua la’o maka’as, ha’u haree mós uma afetadu sira, uma troka uma komesa la’o ona, ha’u mós tun ba haree ezekusaun iha Sekretáriu ho diresaun hotu, komesa sa’e neneik ona, ha’u fiar katak to’o novembru dezembru ezekusaun OJE ne’e ita sei sa’e maka’as,” nia promete. .
Nia esplika, atu halo ezekusaun ba orsamentu ne’e di’ak, labele prezidente mesak, tenke servisu tomak iha autoridade nian, funsionáriu, no sira-ne’ebé ezekuta projetu iha terrenu, emprezáriu sira tenke servisu maka’as, rai ne’e atu la’o ba oin, só liuhosi servisu.
Notísia relevante: OJE 2023: RAEOA define programa 16 korresponde ho millaun $120
Entretantu, bazea ezekusaun real ba OJE iha RAEOA durante ne’e ezekuta ba kategória lima depois de ratifikasaun no daudaun ne’e atinje ona 43%.
Jornalista: Abílio Elo Nini
Editór: Evaristo Soares Martins
