DILI, 08 novembru 2023 (TATOLI)–Governu liuhosi reuniaun Konsellu Ministru delibera hodi fó toleránsia pontu iha loron 13 novembru, ba funsionáriu, ajente no traballadór administrasaun direta Estadu nian, bele sentrál nune’e mós deskonsentradu, inklui organizmu administrasaun indireta.
“Governu deside toleránsia pontu hodi fasilita partisipasaun populasaun iha votasaun daruak ba eleisaun Xefe suku,” Vise-Ministru Asuntu Parlamentár, Adérito Hugo da Costa, hateten hafoin reuniaun ezekutivu, iha Palásiu Governu.
Notísia relevante : Governu deside loron 27 outubru toleránsia pontu
Desizaun ne’e tanba suku hamutuk 442 ne’ebé partisipa eleisaun órgaun suku, iha suku 171 mak eleje ona sira-nia Xefe suku iha ronde dahuluk, enkuantu suku 200 resin kontinua ba ronde daruak.
“Entaun Governu haree katak nafatin presiza partisipasaun másimu sidadaun hotu nian iha eventu nasionál ne’e, maski parte balun haree katak eleisaun ida-ne’e hanesan akontese pasu ida ba kotuk maibé Governu haree nafatin katak nível partisipasaun povu nian di’ak tebes iha eleisaun ne’e,” nia akresenta.
Governante ne’e subliña, toleránsia pontu iha de’it loron 13 novembru, katak loron-ida de’it tanba loron feriadu barak demais ona.
“Se Timor ne’e agora tama ona ba hanesan país ida indústria ne’e setór privadu sira protesta ona tanba feriadu barak demais, liu-liu iha fulan-novembru no dezembru,” nia tenik.
Jornalista : Antónia Gusmão
Editora : Julia Chatarina
