iklan

DILI, KAPITÁL

MKI reabilita jardin matak neen iha Dili

MKI reabilita jardin matak neen iha Dili

Traballadór Kompaña FARI VIOLET Unipesoal Lda, hala'o reabilitasaun ba Jardin Motael Dili, kuarta (21/06). Imajen Tatoli/Francisco Sony.

DILI, 08 novembru 2023 (TATOLI)– Ministériu Komérsiu Indústria (MKI) daudaun ne’e halo hela reabilitasaun ba “Jardin Matak” neen (6) iha kapitál Dili, hanesan jardin Faról, 05 de Maio, Palásiu Governu, Largo de Lecidere, Mandarin no no jardin Motael.

Notísia Relevante: Tinan 2023, AMD sei reabilita jardin lima iha kapitál Díli

“Ida-ne’e desizaun polítika IX Governu Konstitusionál ne’ebé foka ba espasu verde iha primeiru trimestrál ka kompromisu loron 120 nian, Ne’ebé, agora dadauk empreza sira reabilita daudaun jardin hirak ne’e,” Xefe Departamentu Dezenvolvimentu Turístiku iha Ministériu Komérsiu Indústria (MKI), Arnaldo Freitas, hateten ba Agência Tatoli iha Faról, kuarta ne’e.

Empreza sira-ne’ebé halo reabilitasaun ba jardin hirak ne’e, foku liu ba halo reabilitasaun ba fatin sira atu kuda aifunan no hadi’a iluminasaun sira-ne’e aat ka nakfera.

IX Governu Konstitusionál aloka orsamentu besik hamutuk $400.000 hodi reabilita jardin sira iha kapitál Dili ne’ebé tuir planu sei finaliza iha dezembru 2023.

“Tuir kontratu, reabilitasaun ba jardin sira-ne’e sei termina iha dezembru. Reabilitasaun ne’e hahu iha fulan-novembru,” nia hateten.

Husu kona-ba iluminasaun iha sítiu turístiku relijiozau Tasi-Tolu ne’ebé hetan estraga no bee-moos laiha ne’e, nia hatán, Governu propoin hela Orsamentu Jerál Estadu (OJE) 2024 hodi bele reabilita fatin turístiku sira iha Timor-Leste.

“Tinan ida ita labele hadi’a ba iluminasaun no bee iha fatin turizmu iha estátua João Paulo II Tasi-Tolu, tanba osan sira aloka ba reabilitasaun tinan ida-ne’e foka de’it ba espasu verde,” nia dehan.

Empreza sira-ne’ebé halo reabilitasaun ba jardin verde iha kapitál ne’e mak empreza Pali-Pali Unipessoál, Lda, Samo Hali Unipesoál, Lda, Chettlyne Construction, Lda, Visio Dei Uniprsoál, Lda, Quintas das Flores Unipesoál, Lda no empreza Jenic Enterprises Uniprsoál, Lda.

Jornalista : Jesuína Xavier                              

Editór        : Cancio Ximenes

 

iklan
iklan

Leave a Reply

iklan
error: Content is protected !!