DILI, 07 novembru 2023 (TATOLI) - Portavós Komandu Jerál PNTL, Superintendente Polísia, António da Luz, hateten Investigadór Komandu PNTL Bobonaro hamutuk ho Departamentu Investigasaun Kriminál Nasionál, hahú ona investigasaun ba konfrontu ne’ebé akontese iha Suku Lourba, Postu Adminitrativu Bobonaro, Munisípiu Bobonaro, iha loron (3/11) foin lalais ne’e.
Nia dehan, Investigadór Komandu PNTL Bobonaro hamutuk ho Departamentu Investigasaun Kriminál Nasionál, iha hela terenu hodi halo investigasaun kle’an ba kazu konfrontu ne’e.
Tanba hosi konfrontu entre suku rua, Lourba no Carabau ne’e, ema nain hitu mak sai ona vítima, hirak ne’e nain tolu kanek gravé no nain haat mak kanek kamaan inklui uma sanulu hetan sunu.
Tanba ne’e, PNTL tenke halo investigasaun kle’an hodi hatene movitu loloos hosi kazu ne’e tanba sá mak mosu konfrontu hodi rezulta ema nain hitu kanek inklui uma komunidade nian hetan sunu.
“Agora daudaun ita-nia investigadór sira mós halo hela servisu identifikasaun ba kazu ne’ebé akontese iha loron (3/11), ne’e entre suku rua Louba no Carabau, tanba ita bo’ot sira hatene, iha akontesimentu ne’e iha komunidade sira nian uma lubuk ida mak hetan estragu no sunu no iha mós ema-nain hitu mak kanek”, António da Luz hateten ba jornalista sira iha Sentru Formasaun Polísia (CFP,sigla portugés), Comoro, tersa ne’e.
Nia dehan, entre ema nain hitu ne’e iha nain haat maka kanek kaman no iha tolu mak kanek todan, hosi vítima nain tolu ne’e, iha nain ida mak hetan operasaun tanba nia kondisaun gravé duni inklui ida mak sei iha hela óspitál nasionál hodi halo tratamentu ida no seluk ne’e alta ona.
Da Luz hatete, komandu sei la nonok, tanba ne’e, investigadór sira halo ona invetigasaun ba kazu ne’e atu bele identifika lalais autór ba kazu no motivu hosi kazu ne’e.
Tanba ne’e, Portavós Komandu Jerál PNTL ne’e husu husu komunidade atu pasiénsia tanba investigasaun la’o hela.
Hatan kona-ba okum PNTL mak tiru joven sira iha konfrontu ne’e, António da Luz, hateten labele fundamenta buat ruma tanba prosesu ba kazu ne’e la’o.
“Ida ne’e ha’u labele hateten buat ida, hosik ba tanba kazu ne’e sei iha hela prosesu nia laran no prosesu investigasaun mak ita sei hatene, vítima sira ne’e kanek tanba bala musan mak kona ka oinsá, ita hein prosesu investigasaun mak sei justifika”, nia haktuir.
“Ita labele fó sai uluk buat ne’ebé sei iha hela prosesu nia laran, tanba ne’e segredu justisa. Ita hein katak iha tempu badak ita sei hetan autór sira no motivu hosi kazu ne’e”, nia konklui.
Notísia relevante : PNTL sei investiga ema na’in-hitu deskonfia envolve kazu Lourba-Karabau
Jornalista: Natalino Costa
Editór : Zezito Silva
