COVALIMA, ELEISAUN, HEADLINE

CNE avalia realizasaun eleisaun suku primeira volta ho autoridade Covalima

CNE avalia realizasaun eleisaun suku primeira volta ho autoridade Covalima

Autoridade Covalima partisipa enkontru avaliasaun ba eleisaun Komunitária iha primeira volta. Imajen Tatoli/Celestina Teles.

COVALIMA, 09 novembru 2023 (TATOLI) – Komisaun Nasionál ba Eleisaun (CNE, sigla portugés) hala’o enkontru ho autoridade sira iha Covalima hodi avalia lala’ok eleisaun ba lidér komunitáriu sira iha primeira volta.

Diretór Nasionál Edukasaun Sívika Partidu Polítiku no Mídia, Carlos Alves Lopes, hateten reuniaun ne’e atu rona preokupasaun husi autoridade sira kona-ba prosesu eleisaun ne’ebé mak hala’o ona iha 28 novembru, nune’e bele rejista sira-nian hanoin no bainhira halo alterasaun ba lei númeru 9/2016, Lei Suku, lejisladór sira bele ajusta preokupasaun autoridade sira-nian.

Iha enkonteu ne’e administradór postu no xefe suku sira hato’o lamentasaun kona-ba Sekretáriu Tékniku Administrasaun Eleitorál (STAE) la prodús lista votante, nune’e difikulta meza asembleia aldeia na’in-3, tanba boletin votu ba delegadu sira hakerek de’it ho liman no halo eleitór barak la vota.

Preokupasaun seluk mak boletin votu ba xefe aldeia, delegadu/a laiha fotografia no difikulta inan-aman sira ne’ebé lahatene lee no hakerek atu vota. Tanba ne’e, administradór postu no xefe suku sira rekomenda bainhira realiza eleisaun lidér komunitáriu iha futuru boletin votu tenke iha fotografia.

Leonito Gusmão, Xefe Suku Belekasauk, lembra katak durante eleisaun komunidade sira preokupa tanba boletin votu ba xefe aldeia no delegadu sira hakerek de’it no bainhira xefe aldeia sira la manán tenke halo kedan eleisaun segunda volta, nune’e eleitór sira vota to’o kalan.

“Tuir loloos, bainhira eleisaun ba kandidatu xefe aldeia sira iha primeira volta la konsege manán, entaun fó tempu loron ida hanesan ne’e maka bele kontinua fali”, sujere.

Tuir dadus husi STAE Covalima, kandidatura xefe suku ne’ebé kompete iha eleisaun primeira volta hamutuk 164, kompostu husi mane 148 no feto 16. Husi rezultadu eleisaun hatudu katak kandidatura na’in-49 iha feto-tolu maka tama iha eleisaun segunda volta.

Eleisaun segunda volta ba kandidatura xefe suku sira sei hala’o iha loron 13 fulan-novembru.

Notísia relevante: PNTL Covalima la rejista krime eleitorál iha eleisaun suku 2023

Jornalista: Celestina Teles

Editora: Maria Auxiliadora  

iklan
iklan

Leave a Reply

iklan
error: Content is protected !!