COVALIMA, 09 novembru 2023 (TATOLI)–Xefe Unidade Eletrisidade Timor-Leste, Empreza Públika (EDTL, E.P) Covalima, Alexandre Seran, hateten tékniku EDTL, E.P instala ona kontadór prepagu hamutuk 5.589 ba kliénte sira iha suku 29 iha Covalima.
Notísia Relevante: Komunidade Dato Tolu seidauk asesu eletrisidade
“Ita-nia kontadór iha armajen hamutuk 5,720. Tanba tékniku EDTL, E.P sira instala ona kontadór lubuk ida mak agora kontadór ne’ebé rai hela iha armajen EDTL ne’e hamutuk 131,” Alexandre Seran hateten ba Agência Tatoli, iha nia kna’ar fatin Bairu Costa, kinta ne’e.
Tuir nia, hosi suku 29 ne’e agora hela de’it suku Dato Tolu, postu administrative Fohorem mak tékniku EDT, E.P sira seidauk instala kontadór prepagu ba kliénte sira tanba suku refere to’o agora seidauk asesu liña eletrisidade.
Aleinde ne’e, xefe unidade EDTL, E.P ne’e mós halo ona identifikasaun ba kliénte sira-ne’ebé implementa projetu eletrifikasaun nasionál (PEN) no mós implementa projetu eletrifikasaun komunitária (PEP).
“Ami identifika área ne’ebé seidauk instala kontadór prepagu iha aldeia sira-ne’ebé mak komunidade asesu ona eletrisidade, maibé seidauk instala kontadór prepagu tanba sei fó garansia durante fulan-neen,” nia dehan.
Implementasaun projetu Eletrifikasaun Nasionál (PEN) iha postu administrativu Fatumea presiza tan kontadór 407 atu halo instalasaun, Maucatar presiza 354, Zumalai presiza 550, Fatululik presiza 230 no postu Fohorem presiza 450.
Implementasaun projetu eletrifikasaun komunitária (PEP) sei instala iha suku Suai Loro, aldeia Weboot sei instala kontadór pregau 70, suku Debos Lonpou kontradór prepagu 25, Labarai Lonsele kontradór prepagu 30, Kasabauk Colo Ama kontadór prepagu 80.
Jornalista : Celestina Teles
Editór : Cancio Ximenes
