DILI, 09 novembru 2023 (TATOLI)–Banku Sentrál Timor-Leste (BCTL, sigla portugés), kinta ne’e, lansa relatóriu trimestrál Fundu Petrolíferu Timor-Leste nian ba trimestre datoluk tinan ne’e, ne’ebé termina iha loron 30 setembru.
“Relatóriu ne’e hatudu katak kapitál fundu nian iha trimestre ikus ne’e mak biliaun $17,520, kompara ho biliaun $18,075 iha fin trimestre dahuluk hafoin ajusta tiha ‘fair value’ dívida privada ba tinan 2022,” Vise-Governadór BCTL, Venâncio Alves Maria, hateten liuhosi konferénsia imprensa, ne’ebé hala’o iha salaun Banku Sentrál, Akait.
Relatóriu ne’e mós hatudu katak totál reseita ne’ebé simu iha trimestre ne’e hamutuk millaun $57,06
Aleinde ne’e, rendimentu brutu hosi investimentu fundu nian hamutuk negativu millaun $307,15, kompostu hosi kupaun no dividendu ne’ebé simu millaun $121,71, mudansa iha valór merkadu nian negativu millaun $426,99 no movimentu cambiais negativu millaun $1,88 iha trimestre ne’e.
“Ne’e rezulta rendimentu ba karteira fundu durante trimestre ne’e -1.21%, enkuantu rendimentu sasukat (benchmark) nian ba períodu ne’e mak -1,33%,” nia akresenta.
Notísia relevante : Fundu Petrolíferu biliaun $18,075 iha trimestre daruak 2023
Lei Fundu Petrolíferu nian espesifika katak BCTL nu’udar Jestór Operasionál, ne’ebé hanesan ajente responsável ba jestaun operasionál Fundu Petrolíferu nian, enkuantu Ministériu Finansa mak responsabiliza atu estabelese estratejia investimentu tomak kona-ba fundu ne’e.
Banku Sentrál jere ona portofoliu besik liu ho pontu referénsia iha trimestre dala-73 dahuluk. Diferensia entre retornu totál portofóliu no pontu referénsia iha períodu ne’e 0,13 ponto de base ou 13%. Dezempeñu retornu fundu hahú hosi inísiu mak 4%
Nune’e, relatóriu trimestre ba dala LXVIII, ne’ebé kobre períodu 01 jullu to’o 30 setembru 2023, inklui kapitál fundu mak billiaun $17,520, osan kontadu brutu fundu tama hosi kontribuisaun kontribuinte hamutuk millaun $57,06.
Enkuantu, osan kontadu líquidu ne’ebé sai hosi fundu durante trimestre ne’e hamutuk millaun $304,225, kompostu hosi transfere ba Orsamentu Estadu millaun $300 no kobre ba kustu jestaun millaun $4,225.
Rendimentu totál portofóliu fundu iha trimestre ne’e mak -1,21%, enkuantu rendimentu sasukat iha períodu ne’e mak -1,33%. Rendimentu portofóliu instrumentu merkadu finanseiru iha períodu ne’e mak -1,30% kompara ho rendimentu referénsia -1,44%.
Jornalista : Antónia Gusmão
Editora : Julia Chatarina
