Konstrusaun ESTV Hera laiha progresu, ME sei hapara empreza Timorindo

DILI, 09 novembru 2023 (TATOLI) – Konstrusaun edifísiu Eskola Sekundária Tékniku Vokasionál (ESTV) Hera dezde 2021 foin mak atinje 36%, tanba ne’e Ministériu Edukasaun (ME) sei deside hapara empreza Timorindo ne’ebé husik nia responsabilidade no hili empreza foun hodi kontinua obra ne’e.

Sekretáriu Estadu Edukasaun Ensinu Sekundáriu no Eskola Téknika, Domingos Lemos, husu ba Diresaun Nasionál Dezenvolvimentu Parke Eskolár atu halo paresér ida ba kestaun ne’e atu iha tempu besik bele iha desizaun ruma ba kontinuasaun obra refere.

“Ha’u hanoin iha tempu besik ne’e, hakarak ka lakohi ita tenke halo netik buat ruma. Karik desizaun atu kansela di’ak liu kansela tiha atubele fó fali ba ema seluk hodi mai hadi’a lalais tiha eskola ne’e”, sekretáriu Estadu dehan ba Tatoli bainhira halo observasaun ba eskola ne’e, ohin.

Nia preokupa tanba konstrusaun edifísiu rua ESTV Hera ho sala aula neen ne’e la’ós andár, maibé dezde 2021 foin maka atinje 36%, signifika empreza laiha responsabilidade, tanba ne’e tenke foti medida ruma atu salva osan Estadu nian.

Konstrusaun edifísiu ne’e tama iha projetu kapitál dezenvolvimentu ne’ebé ninia prosesu hotu Ministériu Edukasaun halo liuhusi konkursu públiku.

Diretór Nasionál Dezenvolvimentu Parke Eskolár, Hélio Lopes, haktuir katak empreza Timorindo hetan ona notifikasaun dala rua husi Ministériu Edukasaun iha Governu anteriór no agora hodi halo konfirmasaun, maibé empreza ne’e nafatin la kumpre ninia responsabilidade.

“Ami fó ona notifikasaun dala rua no iha tempu besik ami sei halo desizaun ba ninia situasaun ho atrazu sira, nune’e labele prejudika tan konstrusaun iha tempu oin mai”, katak.

Diretór ESTV Hera, Domingos Pinto, konfesa katak bainhira rona tiha deklarasaun husi sekretáriu Estadu, nia sente hakmatek tanba iha ona novidade ne’ebé garante duni katak konstrusaun eskola ne’ebé paradu iha ona dalan atu kontinua.

Durante ne’e eskola enfrenta difikuldade tanba falta sala aula no eskola halo esforsu atu estudante sira labele abandonadu.

“Ho deklarasaun ne’ebé membru Governu hasai ne’e di’ak tebes tanba bele hapara ona empreza ne’ebé laiha responsabilidade hodi tau fali empreza foun ne’ebé hakarak serbisu duni”, realsa.

Obra ESTV Hera ne’e ho montante $199.119 ho durasaun projetu husi 30 novembru 2021 to’o 31 maiu 2022.

Notísia relevante: Ministériu Edukasaun sei foti desizaun hasoru empreza Timorindo

Jornalista: Tomé Amado

Editora: Maria Auxiliadora