AILEU, 09 novembru 2023 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, hateten formasaun protókolár no relasaun públika importante ba pesóal administrasaun no jornalista sira.
“Ohin ha’u mai halo abertura ba formasaun protókolu ne’ebé Sentru Formsaun Téknolojia Komunikasaun (CEFTEC , sigla portugés) mak oferese, nune’e mós relasaun públika formandu hamutuk 25, hirak ne’e hosi pesoál administrasaun públika munisipiu Aileu inklui jornalista sira”, Expedito Dias Ximenes, iha nia intervensaun bainhira halo abertura ba formasaun ne’ebé hala’o iha Administrasaun Munisípiu Aileu, kinta ne’e.
Nia dehan, formasaun relasaun públika no protókolu ne’e importante tebes atu ajuda funsionáriu sira iha instituisaun hodi sevi di’ak liután.
“Ida protokolu la’os ita atu hatene de’it atu halo servisu protókolu nian maibé oinsá ita hatene étika bainhira ita halo funsaun hanesan protokolu”, nia informa.
Expedito hateten, IX Governu Konstitusionál komprometidu atu kontinua buka kapasita funsionariu sira iha área relasaun públika no área sira seluk tanba iha mundu dijitalizasaun ejize ema atu adapta buat hotu liuliu hirak ne’ebé halo kna’ar ajente adminstrasaun públika.
Sekretáriu Munisipál Aileu, Felis Maria de Oliveira realsa, formasaun sira ne’e importante tebes atu hasa’e koñesimentu benefiáriu sira nian iha área protokolár no administrasaun públika.
“Formasaun sai hanesan edukasaun ne’ebé importante hodi konstrui matenek, idea, ita la sai ema perfeitu maibé pelumenus sai ema ne’ebé iha koñesimentu no evita ema labele manipula buat ne’ebé la merese iha tempu ida agora”, nia dehan.
Reprezentante Kordenadór CEFTEC, Luis Evaresto Soares, hateten formasaun relasaun públika no prótokolu, SEKOMS liuhosi CEFTEC realiza ona iha Munisípiu Viqueque no ohin hala’o iha Munisípiu Aileu.
Formasaun ne’ebé halao iha Munisipiu Aileu, ho durasaun loron lima ne’ebé partisipa hosi funsonáriu públiku ajente PNTL inklui jornalista Rádiu Komunidade Rai Husar Aileu.
Jornalista: Natalino Costa
Editór : Zezito Silva
