AILEU, 09 novembru 2023 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, promete sei apoia fasilidade komputadór ba Rádiu Komunidade Rahusar Aileu atu jornalista rádiu komunidade bele uza hodi halo servisu ne’ebé di’ak liután.
“Ohin ha’u mai vizita Rádiu Komunidade Rai Husar Aileu hodi haree kondisaun ne’ebé mak iha no iha ha’u nia vizita ne’e haree katak espasu Rádiu Komunidade Rai Husar Husar Aileu iha kondisaun kapas. Maibé sira presiza mak apoiu tán ekipamentu hanesan komputadór no ekipamentu sira seluk tán ne’ebé relasiona ho transmisaun rádiu komunidade nian atu mellora nafatin rádiu ne’e nia tranmisaun hodi bele oferese informasaun ba komunidade munisípiu Aileu”, Expedito Dias Ximenes, hateten bainhira hal’o vizita ba Rádiu Komnidade Rai Husar Aileu, kinta ne’e.
Tuir niaaa, vizita ba rádiu komunidade sira ho objetivu atu haree kondissaun rádiu komunidade iha munisípiu hotu.
Governante ne’e mós agradese ba Autoridade Munisípiu Aileu, tanba bele fó apoiu ba Radiu Komunidade Rai Husar Aileu no fó oportunidade ba jornalista Komunidade Rádiu Rai Husar atu kapasita aan iha área jornalizmu nian.
“Ha’u agradese tebes ba Administradór Munísipiu Aileu nian no Sekretáriu Munisipál, ne’ebé ho protindaun tomak apoia Rádiu Rai Husar Aileu no fó oportunidade ba jornalista hodi kontinua kapasita aan iha mundu jornalizmu iha nivél munisípiu”, nia dehan.
Iha fatin hanesan, Sekretariu Munisipál Aileu, Felis Maria de Oliveira, hateten ho prezensa Sekretáriu Estadu Komunikasaun Sosiál, Expedito Dias Ximenes, ne’e bele apoiu liután Rádiu Komunidade Rai Husar Aileu hodi transmite informasaun ba komunidade Aileu.
Nia dehan, ba oin tenke iha akordu ida entre Sekretáriu Estadu Komunikasaun Sosiál (SEKOMS no Ministériu Administrasaun Estatál (MAE) atu ba futuru SEKOMS no Administrasaun Munisipál bele tau osan hodi bele investe Rádiu Komunidade Rai Husar atu bele dezenvolve ho di’ak, haree hosi rekursu umanu no fasiliddade atu oferese informasaun ba komunidade sira ho di’ak liután.
“Ho prezensaa Sekretáriu Estadu Komunikasaun Sosiál nian bele ajuda atu ba futuru bele dezenvolve rádiu komunidade iha futuru ho di’ak”, nia afirma.
Jestora Rádiu Komunidade Rádiu Komunidade Rai Husar Aileu, Emilia Gusmão, relata durante ne’e RKRHA halo nia servisu ho di’ak liuhosi transmisaun informasaun ba komunidade.
“Maibé foin daudaun transmiter ladi’ak entaun informa tiha ba SEKOMS kona-ba kondisaun refere no parte tékniku rezolve kedan”, nia informa.
Nia dehan, jornalista ne’ebé servisu iha Rádiu Komunidade Aileu iha ema nain neen no voluntáriu iha ema nain haat durante ne’e halao kna’ar jornalizmu nian.
“Maibé fasilidade ne’ebé iha mak iha komputadór rua mak durante sira uza hodi halo servisu loroloron nian inklui motór Estadu iha rua mak ajuda sira hodi halo kobertura”, nia konklui.
Jornalista: Natalino Costa
Editór : Zezito Silva
