DILI, 09 novembru 2023 (TATOLI)–Sekretariadu Tékniku Administrasaun Eleitorál (STAE), kinta ne’e, distribui ona buletin votu hamutuk livru 14.000 inklui materiál sira seluk hanesan urna no kabina ba eleisaun suku segunda ronda, ba munisípiu 13 no RAEOA.
Notísia Relevante: STAE prepara buletin votu 600.000 ba eleisaun suku segunda volta
“Ha’u husu hotu-hotu nia kolaborasaun ho mútua hodi nune’e halo akompañamentu transportasaun materiál sira hotu hosi Dili ba to’o ida-idak nia munisípiu,” Diretór Jerál, STAE, Acilino Manuel Branco, hateten ba jornalista sira, iha ámbitu atribuisaun materiál eleisaun suku nian, iha Empreza Gráfika Nasionál, Taibesi.
Nia husu ba prezidente autoridade no administradór munisípiu, atu kontrola no orienta STAE munisipál hodi halo preparasaun másimu liuliu fó apoiu ba meza eleitorál ne’ebé sei funsiona iha aldeia 1.369 no dalaruma aldeia tolu sei tau hamutuk, maibé meza ida-idak sei funsiona iha kada aldeia.
Acilino Manuel Branco esplika, iha prosesu eleisaun ne’e oras mantein ho eleisaun anteriór nian inklui Pesoál Apoiu STAE (PAS) iha suku, entaun iha oras 09h00 eleitór hahú halo votasaun nune’e husu Prezidente Autoridade sira tenke atensaun hodi garante eleisaun ho di’ak no susesu.
“Iha diretór STAE munisipál sira atu tau atensaun ba iha problema transporte. Nune’e labele akontese fila-fali dezentendimentu ruma hanesan iha eleisaun primeira volta, no mosu inisiativa balun hodi asegura materiál balun tenke to’o iha munisípiu. Husu ida-ne’e labele akontese tan,” nia rekomenda.
Tuir nia, totál folla bulletin votu ba eleisaun suku segunda volta ne’e hamutuk 724.000 no totál 14.000 ba suku 271 iha territóriu nasionál.
Diretór Jerál Ministériu Administrasaun Estatál (MAE), António Augosto Guterres, hateten presiza tau diretór na’in-rua (2) hamutuk ho ONG nasionál hodi halo akompañamentu ba inísiu pakotementu materiál eleisaun hosi munisípiu to’o suku, nune’e fasil hetan relatóriu.
“Hosi ne’e mak ita-boot sira bele fasil hodi hetan relatóriu ne’ebé mais rápidu. Maibé nafatin fó hanoin ba PAM ho AM atu haree transporte ba transportasaun materiál eleisaun suku segunda volta ba suku sira,” nia dehan.
Komandante Operasaun Nasionál PNTL, Superintendente Xefe Polísia José Soares, apela ba komandante PNTL munisipál hotu-hotu atu asegura materiál to’o realizasaun eleisaun suku.
“Hakarak informa ba komandante sira hotu katak ida-ne’e prosesu kontinuasaun, tanba ne’e asegura materiál ne’ebé mak sei distribui ba munisípiu to’o aldeia. Asegura didi’ak tanba ida-ne’e responsabilidade másimu ba ita-boot sira hodi to’o ramata ho susesu,” nia dehan.
Tanba ne’e, nia dehan, bainhira sai hosi ne’e tenke halo distánsia ba malu nune’e to’o iha munisípiu laiha insidente ruma.
Jornalista : Osória Marques
Editór : Cancio Ximenes
