BAUCAU, 10 novembru 2023 (TATOLI) – Kámara Komérsiu no Indústria Timor-Leste (CCI-TL) hato’o petisaun ba governu liuhosi Ministériu Koordenadór Asuntu Ekonomia (MKAE) nu’udar asaun kontra negosiante estranjeiru ne’ebé hala’o atividade negósiu iha Baucau.
Prezidente CCI-TL munisípiu Baucau, José Januário dos Reis ‘Noki’, esplika, tinan-2012 negosiante estranjeiru hahú hala’o atividade fa’an sasán iha Baucau nune’e nu’udar Baucau oan presiza halo impedementu mesmu baze legál fasilita atu halo negosiasaun livremente iha Timor-Leste.
“Ami hahú ho petisaun hodi intrega ba MKAE nune’e bele tulun tanba iha faze klimax ona, ami labele tolera ona tanba konsidera hanesan ameasa ida ba negosiante iha Baucau,” Prezidente CCI-TL Baucau hatete iha Vila Nova, sesta ne’e.
CCI-TL Baucau aseita ho MKAE atu kria lei ruma ho limita movimentu negosiante xineza halo negosiante to’o iha munisípiu inklui área rurál tanba posibilidade bele hamate emprezáriu lokál nia espíritu iha vida negósiu.
Noki argumenta, tuir loloos estadu hatene ona maneira atu kria regulamentu kona-ba atividade negosiante liuliu fó oportunidade ba emprezáriu lokál atu dezenvolve aan di’ak liután.
“Ne’e papél konstitusionál ne’ebé kualkér governu atu implementa la presiza atu ezize hodi prezerva ekonomia nasionál,” Noki akresenta.
Emprezáriu lokal liuhosi CCI-TL la rejeita kualkér tipu investementu maibé tenke ho tipu eskala médiu to’o grande nune’e bele akumula traballadór Baucau oan hodi redús dezempregu maibé atvidade negosiante munisípiu Baucau iha kapasidade atu dezenvolve rasik.
CCI-TL intrega petisaun hamutuk pontu ualu ne’ebé sei integra mos ba Prezidenti Republika (PR), Primeiru Ministru (PM) liña ministeriál inklui Parlamentu Nasionál ho ninia ezijénsia hanesan husu ba governu liuhosi MKAE atu koordena hodi foti solusaun tuir situasaun.
Rejeita munisípiu Baucau atu sai sidadade xineza nune’e tenke kria regulamentu hodi kontrola, autoriza de’it atvidade investimentu ho tipu médiu no grande bazea ba kapitál finanseira, ezize ba Ministériu Justisa atu buka tuir estranjeiru ne’ebé utiliza viza turismu maibé halo atividade negósiu.
Aldende ne’e, husu ba deputadu iha Parlamentu Nasionál nu’udar forsa ba povu bele ajuda atu toma konsidera ba ezizensia sira-ne’e, solisita ba SERVE.IP sukursal Baucau atu labele emite lisensa negósiu ba emprezáriu estranjeiru iha Baucau no Baucau prontu apoia prezensa investimentu estranjeiru ho tipu médiu no grande iha munisípiu Baucau.
Jornalista : Natalino Belo
Editór : Evaristo Soares Martins
