CJMB realiza atividade lima selebra Loron Nasionál Juventude no 12 Novembru
BOBONARO, 10 novembru 2023 (TATOLI)- sentru Juventude Munisípiu Bobonaro (CJMB) realiza aktividade lima hodi selebra Loron Nasionál Juventude ba dala-18 no komemorasaun Masakre Santa Cruz 12 novembru ba dala-32.
Diretór Interinu CMJB, Antoninho Lelo Gonçalves, esplika, atividade ne’ebé mak realiza ohin sesta (10/11) ne’e hanesan semináriu no diskursu públiku ba estudante hosi Eskola Sekundáriu Jerál (ESG, sigla portugés) númeru 1 Dom Martinho da Costa Lopes Maliana, Eskola CAFE Maliana, Institutu TeknolojA (IT) inklui estudante hosi eskola balu no joven sira seluk tán.
Tema ba serimónia tinan ne’e mak “Ho espíritu 12 promove kreatividade no koñesimentu krítiku foinsa’e sira-nia hodi harii sosiedade ida kontribuiente no inkluzivu’.
Nia dehan, ho temátiku ne’e oinsa atu motiva joven sira atu banati tuir luta ne’ebé maka juventude loriku as’wain sira halo ona iha pasadu to’o oferese sira-nia isin ba independénsia Timor-Leste.
Tanba ne’e nia apela ba joven sira iha munisípiu Bobonaro atu kontribui ba pás no estabilidade hodi valoriza eroína sira-ne’ebé sakrifika sira nia-aan luta ba independénsia.
“Ita haree katak agora sosiedade ida-ne’ebé maka nakonu ho konflitu barak ne’ebé mak mosu, hanesan sai ona alvu ne’ebé loloos, foinsa’e sira-ne’ebé mak iha kreatividade di’ak, maibé na realidade hatudu katak joven sira-ne’ebé mak futuru, talves sai fali autór ba konflitu,” nia informa ba Tatoli, iha salaun administrasaun postu Maliana.
Aban, Sentru Joventude mós sei realiza limpeza jerál iha kapitál Maliana, kalan reflesaun hafoin ne’e sei realiza misa agardesimentu iha Igereza Parókia Santa Cruz Maliana no taka ho atividade kari ai-funan iha semitériu Santa Cruz.
“Ha’u husu joven sira hotu atu partisipa, hodi fó omenajen ba nia joventude loriku as’wain sira, tanba sira-nia luta hanesan onra boot ida mai ita, entaun ita mai fó obrigadu no agardese ba sira liu hosi sunu lilin atu nune’e lilin bele sai naroman ba sira, hanesan esperansa boot ida ba sira, mos bele sai naroman nafatin ba ita iha futuru,” nia sujere.
Tinan ne’e CMJB hetan orsamentu hosi Ministériu Juventude, Desportu, Arte no Kultura (MJDAK) hamutuk rihun $6,500. Hosi montante ne’e sei aloka ba kada postu hodi realiza atividade hanesan.
Notisia relevante: Boxista 44 sei kompete iha Fight Night Boxe selebra 12 Novembru
Jornalista: Sérgio da Cruz
Editór: Evaristo Soares Martins
