BOBONARO, 10 novembru 2023 (TATOLI) – Komisaun Nasionál Eleisaun (CNE, sigla portugués) Munisípiu Bobonaro, hamutuk ho autoridade munisípiu Bobonaro no Sekretaridu Tékniku Administrasaun Eleitorál, sesta ne’e halo enkontru ho xefe aldeia, delegadu, delegada no kandidatu xefe suku sira, hodi halo avaliasaun ba realizasaun eleisaun suku volta dahuluk no prepara ba volta daruak iha 13 novembru 2023.
Diretór CNE Munisípiu Bobonaro, Juvito Ramos, informa, objetivu hosi enkontru ne’e atu avalia no rona preokupasaun hosi entidade hotu, tanba iha primeira volta mosu irregularidade barak no fallansu tékniku balu hodi halo eleitór sira barak kestiona atendimentu no tempu.
“Ha’u hanoin ohin loron ita hotu bolu malu mai iha-ne’e oinsá hadi’ak buat sira-ne’e kona-bá fa;lansu tékniku sira, ita-nia irregularidade ne’ebé mak ita komete, ba segunda volta buat sira ne’e labele akontese tán, nune’e eleisaun ne’e remata projetu hotu hotu tenke tuir lei, kódigu konduta, hodi fó susesu ba eleisaun ne’e,” nia hateten iha salaun CNE, Soso, Maliana.
Representante Prezidente Autoridade Munisípiu Bobonaro, Gizela Pirres, informa, durante realizasaun prosesu eleisaun hahú hosi preparasaun to’o apuramentu finál, jeralmenet hatudu rezultadu di’ak, maibé mosu krítika no lamentasaun hosi entidade oinoin, liuliu komunidade.
“Maibe esforsu hosi autoridade munisípiu no órgaun eleitorál rua halo mak nune’e, ita atu ko’alia oinsa, tanba lei mak regula, ita hotu tuir, matadalan iha ona, giaun iha ona,” nia hateten.
Maibé Diretora Apoia Organizasaun Apoia sosiedade Sivíl no lideransa komunitária ne’e, konsidera problema sira ne’e sai sasukat ida ba órgaun implementadór sira atubele hadi’ak iha eleisaun segunda volta.
Nia husu ba eleitór sira atu kontinua partisipa iha eleisaun no ba kandidatu xefe suku sira atu simu rezultadu bainhira manán ka lakon no labele halo provokasaun tanba governu deside munisípiu Bobonaro sai fatin realizasaun eventu interkámbiu festivál kulturál fronteira ba promove rekonsiliasaun.
“Ita-boot sira-ne’ebé konkorre ne’e, kuandu la liu, labele rai odiu, ba ita-nia apoiante sira katak ha’u la liu ona koopera nafatin, ita-nia eventu boot sira hanesan ita lakohi hansan akontese iha Lourba ho Carabau, tanba ne’e festa boot ho ita-nia nasaun viziñu, ita-nia bainaka sira mai, hatudu ba katak Bobonaro oan ne’e unidade, maske iha li’ur ema haree ladi’ak, maibé iha laran ne’e ita unidade,” nia fó hanoin.
Administradór postu administrativu Maliana, Tomás Laco Loe, apela ba apoiante kandidatu xefe suku sira labele provoka malu durante eleisaun la’o.
“Imi mesak Maliana oan, Bobonaro oan hotu, ne’ebé lakon ka manán, imi-nia hotu, koopera malu nafatin, ita bele manán ne’e mós labele sadik malu dehan la halo, liafuan ida la halo ne’e mak bele estraga ita-nia estabilidade iha ita-nia rai, bele akontese hanesan Lourba ho Carabau, maibé ita espera la akontese tanba ita mesak família de’it,” nia fó hanoin.
Komandante Opersaun PNTL Munisípiu Bobonaro, Inspetór Xefe Sabino Soares, dehan, maske iha eleisaun liubá membru PNTL sira hasoru difikuldade balu kona-bá transporte atu lori fila hosi sentru votasaun, maibé hanesan autoridade seguransa nafatin hamriik firme hodi fó apoia iha eleisaun segunda volta.
“Orientasaun komandu ne’e katak atu asegura materiál sensitivu sira, tanba ema sira ita hili ne’e mos atu lori nasaun ne’e ba oin, tanba ne’e ha’u husu ba komunidade hotu-hotu katak ita hotu kontribui, seguransa ne’e la’o iha PNTL de’it, iha ita hotu-hotu nia liman,” nia dehan.
Nia husu ba ekipa Ofisiál Supervizaun Eleitorál (OSE) atu koopera servisu ho autoridade seguransa tuir lema CNE katak, demokrasia, transparánsia, imparsialidade no neutralidade hodi fó susesu ba eleisaun suku.
Jornalista: Sérgio da Cruz
Editór: Evaristo Soares Martins
