DILI, 10 novembru 2023 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), finaliza ona diskusaun iha faze espesialidade ba proposta-lei ba Rejiaun Administrativa Espesiál Oé-Cusse no Ambeno (RAEOA) no estabelese Zona Espesiál Ekonómia Sosiál Merkadu (ZEESM)
Komisaun A finaliza dsikusaun ba proposta-lei númeru 2/VI (1a), terseira alterasaun lei númeru 3/2014, 18 juñu, ne‘ebé kria Rejiaun Administrativa Espesiál Oé-Cusse no Ambeno (RAEOA) no estabelese Zona Espesiál Ekonómia Sosiál Merkadu (ZEESM) no Ataúro, inklui proposta-lei númeru 3/VI (1a), alterasaun dahaat lei 11/2009, 7 outubru , ne’ebé aprova Divizaun Administrativa Territóriu.
Notísia Relevante: PN aprova alterasaun lei kriasaun RAEOA-ZEESM iha faze jeneralidade
“Alterasaun ba lei RAEOA-ZEESM ho Divizaun Administrativu nia prosesu diskusaun agora komisaun nia serbisu hotu ona no submete ona relatóriu paresér ba debate espesialidade nian ba ona iha meza Parlamentu, no hein meza mak atu tau ba ajenda debate finál globál iha plenária,” Prezidente komisaun A, Patrocínio Fernandes, hateten ba jornalista sira iha uma fukum PN, sesta ne’e.
Iha diskusaun faze espesialidade ne’e, iha komisaun A ne’e iha proposta lubun ida-ne’ebé Deputadu sira aprezenta hosi bankada opozisaun no bankada Governu.
Proposta sira-ne’e emenda liga ba kestaun téknika bele armoniza di’ak liután entermu ninia redasaun, nune’e proposta balun pasa no balun la pasa, ida-ne’e prosesu normál iha natureza diskusaun, Deputadu sira hotu iha direitu atu hato’o sira-nia proposta tau ba diskusaun hafoin prosede ba votasaun mak determina.
“Proposta ida-ne’ebé la pasa mai hosi bankada FRETILIN ko’alia kona-ba atu elimina artigu balun, ne’ebé artigu sira-ne’e mak sai hanesan substánsia loloos ba proposta-lei ida atu altera ne’e. Se proposta ne’e liu entaun lei ne’e mate, la presiza lori ona debate iha finál global. Ha’u haree proposta ida-ne’e la liu parte proponente halo rekursu plenária, nune’e iha finál globál depois sei haree, Ne’ebé, nia prosesu se rekerementu tama iha meza sei pronúnsia hodi prosede ba votasaun,” nia hateten.
Jornalista : Nelson de Sousa
Editór : Cancio Ximenes
