DILI, 10 novembru 2023 (TATOLI) – Konstrusaun edifísiu Eskola Bázika Filiál 1,2 Fatuhada ho andar rua konsidera laiha kualidade, nune’e Ministériu Edukasaun husu empreza Betuhei atu hadi’a obra ne’e.
Edifísiu foun ho andar rua no iha sala aula 12 ne’e tama iha projetu kapitál dezenvolvimentu 2021 nian ne’ebé Ministériu Edukasaun prevee $727,422.58, maibé obra ne’e to’o agora foin maka atinje 14%.
“Ne’e signifika kompañia laiha seriedade. Aat liután maka obra ne’e tarde tiha konstrusaun, laiha kualidade, ninia riin sira hahú nakfera ona”, Sekretáriu Estadu Edukasaun Ensinu Sekundáriu no Eskola Téknika, Domingos Lemos, hatete bainhira halo observasaun direta ba eskola refere.
Tuir Domingos Lemos, planu ministériu nian hakarak obra ne’e tenke finaliza iha abríl 2024, nune’e estudante 931 ne’ebé agora transfere fali bá eskola provizória ne’e bele kontinua sira-nian prosesu aprendizajen iha fatin ne’ebé adekuadu no empreza tenke asume responsabilidade hodi aselera konstrusaun ne’e.
“Ha’u husu ona ba kompañia atu halalais prosesu konstrusaun ne’e atu iha fulan-abríl bele entrega ona mai ministériu, tanba lakleur tan udan no sei fó impaktu ba estudante lubuk ida ne’ebé agora hala’o hela prosesu aprendizajen iha fatin ne’ebé ladún seguru ba sira”, afirma.
Iha sorin sleuk, Diretór Nasionál Dezenvolvimentu Parke Eskolár, Hélio Lopes, hatete preokupasaun sekretáriu Estadu nian ne’e pertinente duni, tanba ne’e nia mós husu ona ba empreza Betuhei atu haree asuntu ne’e, liuliu tau atensaun ba item sira ne’ebé laiha kualidade hodi hadi’ak, nune’e bele garante kualidade obra.
Dirijente ne’e informa katak konstrusaun eskola EBF Fatuhada ne’e mós tama iha lista mean Ministériu Edukasaun nian, maibé ne’e atu fó xamada atensaun ida atu sira bele aselera prosesu konstrusaun no garante kualidade.
Reprezentante empreza Betuhei, Aida Guterres Lobo, afirma katak koluna riin eskola ne’ebé rahun ne’e sira-nian responsabilidade, tanba la tau atensaun ba kualidade obra refere.
“Ami admite duni katak prosesu teste ne’ebé maka foin lalais halo ne’e ninia rezultadu la tuir buat ne’ebé iha. Ami sei halo esforsu hodi buka maneira atu rezolve problema ida ne’e”, dehan.
Nia hatutan atu baku rahun ai-riin hodi hadi’a fali koluna ne’e, daudaun seidauk bele tanba tenke hein lai rezultadu teste hafoin empreza sei foti nia konkluzaun. Tanba prosesu teste ne’e rasik hala’o iha laboratóriu Ajénsia Dezenvolvimentu Nasionál (ADN), nune’e presiza hein hodi bele haree iha prosesu tuirmai.
Notísia relevante: Implementasaun merenda eskolár iha EBF Fatuhada la másima
Jornalista: Tomé Amado
Editora: Maria Auxiliadora
