COVALIMA, POLÍTIKA

Autoridade Covalima husu joven banati juventude loriku asswa’in kria unidade

Autoridade Covalima husu joven banati juventude loriku asswa’in kria unidade

Administradór Munisípiu Covalima, Francisco de Andrade.

COVALIMA, 12 novembru 2023 (TATOLI)–Administradór munísipiu Covalima, Francisco de Andrade hateten, komemorasaun masakre 12 novembru ba dala-32 ne’e nia parte husu ba joven sira banati tuir juventude loriku asswa’in atu kria unidade.

Notísia Relevante: Assanami: “Ema-ne’ebé halo violénsia halo traisaun hasoru eroi sira”

Komemorasaun loron nasionál juventude no masakre 12 novembru ba tinan 2023 ne’e ho tema “Ho Espíritu 12 Novembru Promove Kreatividade no Pensamentu Krítiku Foinsa’e hodi Harii Sosiedade Kontribuente no Inkluzivu”.

“Ohin, ita komemora masakre santa cruz 12 novembru ne’e hodi hanoin hikas juventude nia luta atu hetan independénsia,” Autoridade Covalima ne’e hateten ba jornalista sira iha resintu edifísiu STAE Covalima, Kampung Baru, domingu ne’e.

Kria unidade, tuir nia, tanba juventude loriku asswa’in ne’ebé uluk luta ba autodeterminasaun ne’e mós envolve aan iha grupu arte marsiál oioin maibé sira kria unidade luta ba objetivu ida mak ukun rasik aan, duké kompara ho joven agora nian ne’e ida-idak hamriik iha nia grupu arte marsiál hodi kria instabilidade.

“Juventude loriku asswa’in envolve iha Grupu Arte Marsiál (GAM) oioin, sira kria unidade metin. Ita kompara ho joven-sira agora hamriik iha ida-idak nia Grupu Arte Marsiál sai fali inimigu, tanba ne’e joven-sira tenke kria unidade,” nia dehan.

Komemorasaun 12 novembru iha Covalima hala’o atividade sira hanesan semináriu, marsa saudavél, kompetisaun diskursu públiku nivél ensinu sekundáriu no seluk tan, ne’ebé Ministériu Juventude no Desportu Arte no Kultura (MJDAK) liuhosi Centro Juventude Covalima (CJC) ne’e hamutuk $1,500.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!