Assanami: “Ema-ne’ebé halo violénsia halo traisaun hasoru eroi sira”
DILI, 12 novembru 2023 (TATOLI)—Vise Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, hateten ema-ne’ebé sobu fali ema seluk nia liberdade no halo violénsia ne’e halo traisaun ba eroi sira
Notísia Relevante: Joana Dias: “Ha’u foin reza “Pai Nosso” tolu, ema tiru ona ami”
“Iha rai lulik ida-ne’e laiha ema ida mak bele satan no sobu fali ema seluk nia liberdade no laiha ema ida mak mai sunu ema seluk nia uma. Ema ida-ne’ebé mak mai halo violénsia ne’e halo traisaun hasoru eroi sira ninia fakar raan iha rai ida-ne’e,” Assanami hateten liuhosi nia diskursu komemorasaun loron masakre 12 novembru ba dala-32 (12 novembru 1991-12 novembru 2023) ne’ebé selebra iha semitériu Santa Crús, domingu ne’e.
Tanba ne’e, nia husu ba inan-aman sira, joven sira membru grupu arte marsiál (GAM) no grupu arte ritual (GAR) sira-ne’ebé mak rona mensajen ne’e iha uma ka iha ne’e karik, atu apela ba ema hotu katak timor nia oan ne’e mai hosi hun ida, abut ida, povu ida rai Timor ida de’it.
“Organizasaun ka partidu labele mai hafahe timoroan sira. Tanba sira-ne’e hotu hanesan instrumentu ka rikusoin Estadu nian, atu kadi nafatin kakutak timoroan sira-nian hodi hakat ba oin,” nia hateten.
Tanba, nia dehan, juventude loriko asswa’in sira iha momentu ne’ebá (1991) hatudu duni sira-nia unidade hodi luta kontra kolonialista sira-ne’ebé mak mai okupa Timor-Leste, liuhosi sira ninia dedikasaun hodi mate ba rai ida-ne’e liuhosi luta ho bandeira FRETILIN, UDT, OJTL, bandeira Portugal no ne’e atu simboliza katak unidade ne’e importante tebes.
“Ohin, ita ukun aan ona ita iha partidu oioin, ita iha arte marsiál oioin, arte rituál oioin, organizasaun oioin no étniku ka lian oioin ne’e la loos atu hakotu ita nia unifikasaun. Maibé ho espíritu unidade liuhosi fakar raan iha masakre 12 novembru ida-ne’e, nu’udar mensajen ida atu hateten ba mundu katak luta ida sei la’o hela rai laran hodi defende dignidade no direitu timoroan sira-nian iha rai ida-ne’e,” nia dehan.
Governante ne’e haktuir, mensajen 12 novembru nian ne’e espesiál ba joven sira liuliu jerasaun foun kontinuadór atu mehi nafatin hodi hatutan juventude loriku asswa’in sira-nia luta uluk nian, atu bele lori Timor-Leste adere ba AZEAN no selu-seluk tan.
Esforsu sira-ne’e, tuir Assanami, konsidera hanesan kampu batalla hodi dedika dixiplina hodi hakas aan servisu atu bele atinje saida mak eroi sira mehi no hanoin atu atinje objetivu luta, hodi hetan moris di’ak no goza liberdade ida ne’e.
“Ne’eduni, ohin, imi livre la’o ba la’o mai bele aprende di’ak liu tan. Ne’e, tanba imi-nia aman sira, imi-nia maun sira no imi-nia avó sira nia mate,” nia hateten.
Notísia Relevante: Sé Mak Responsabiliza? Xanana Gusmão!
Jornalista : Tomé Amado
Editór : Cancio Ximenes
