VIQUEQUE, 12 novembru 2023 (TATOLI)—Pároku Nossa Senhora do Rosario Fátima Uatucarbau, Andrew Pio Masi, SVD, hateten iha masakre santa cruz 12 novembru ne’e eroi barak mak mate, tanba ne’e husu ba líideransa sira nafatin iha vizaun no misaun hodi lori Timor-Leste ba oin.
Notísia Relevante: Militár Sira Lori Karreta “HINO” Sama-Mate Vítima Masakre Santa Cruz
“Ba komemorasaun 12 novembru ida-ne’e, ita relembra fila-fali eroi sira liuhosi misa no atividade sira hodi hanoin sira-nia mate, nune’e Timor-Leste tenke la’o ba oin la’ós ba kotuk. Lideransa sira hahú hosi xefe aldeia, xefe suku, adiministradór, Primeiru-Ministru, Parlamentu no Prezidente tenke iha vizaun no misaun hodi lori nasaun ba oin. Tanba eroi sira lakon vida hodi intrega nasaun ba ita, nune’e ita ne’ebé sei moris lori nasaun ne’e ba oin,” Pároku Andrew Pio Masi, SVD, hateten liuhosi omilia iha selebrasaun misa agradesimentu ba komemorasaun masakre 12 novembru ba dala-32, iha igreja Nossa Senhora do Rosario Fátima Uatucarbau, domingu ne’e.
Pe. Andrew hateten, lideransa sira tenke inisiativa kria programa hanesan lutadór ka eroi sira uluk, ne’ebé iha inisiativa mate ba Timor-Leste nia idependénsia.
Nune’e, ukun-na’in sira tenke iha misaun no vizaun, tanba se misaun no vizaun mak namlele tun-sa’e ne’e, lideransa sira atu lori Timor-Leste ba ne’ebé no Timor-Leste nia loron aban ne’e sai oinsá loos.
“Tanba nasaun ida-ne’e harii timoroan barak mak raan fakar no mate, mak povu no rai ne’e bele livre. Ita haree masakre santa cruz 12 novembru 1991 ne’e joven barak mak mate, nune’e loron ohin nu’udar loron santu hodi ita hanoin fali sira-nia mate,” nia hateten.
Adiministradór postu Uatucarbau, Alfredo dos Santos, hateten momentu ida-ne’e hodi hanoin hikas ba eroi sira-ne’ebé lakon vida, maske hanoin eroi sira ho matan been taba lakon família maibé tenke valoriza sira.
“Loron ohin ita hanoin fali ba eroi sira-ne’ebé lakon vida ba rai ida-ne’e. Maske ita hanoin ho matan-been tanba lakon família, ita nafatin valoriza eroi sira. Ho nune’e, jerasaun foun sira tenke banati tuir eroi sira hodi tane rai doben Timor-Leste,” nia dehan.
Hafoin misa agradesementu ba komemorasaun 12 novembru ne’e abitante sira kontinua lori aifunan no lilin ba simetériu públiku iha suku Uani-Uma, ne’ebé partisipa hosi autoridade komunitária, autoridade seguransa postu Uatucarbau no abitante sira. Uatucarbau.
Notísia Relevante: Komemora 12 novembru: Joven sira tenke hadook aan hosi violénsia
Jornalista : Vitorino Lopes da Costa
Editór : Cancio Ximenes
