Tomas Ulan, garante manán eleisaun suku volta daruak lidera suku Usitasa’e
OÉ-CUSSE, 13 novembru 2023 (TATOLI) – Kandidatu xefe suku Usitasa’e, iha sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), ho númeru sorteiu rua (2), Tomas Ulan Colo, otimista sei manán iha eleisaun orgaun suku volta daruak hosi lidera suku Usitasa’e ba períodu 2023 to’o 2030.
Notísia relevante: Sentru votasaun Usitasa’e Oé-Cusse hahú kontajen
Totál eleitór iha suku Usitasa’e hamutuk 2.890 mane 1.470 no feto 1.420 mai hosi aldeia tolu, aldeia Sifin hamutuk 809 mane 420 no feto 389, aldeia Pune hamutuk 1.011 mane 497 no feto 514, aldeia Buqui hamutuk 1.070 mane 553 no feto 517.
Eleisaun orgaun suku volta dahuluk kandidatura iha suku Usitasa’e hamutuk ema na’in-neen maioria mane hotu, hanesan, Agustinho da Caunan, Blasco Ulan, Liberato Punef, Ricardo Sufa, Tomas Colo no Venancio Caunan.
Maibé kandidatu na’in-rua maka avansa iha eleisaun orgaun suku volta daruak, hosi kandidatu dahuluk, Liberato Punef no kandidatu daruak, maka Tomas Ulan Colo.
“Ha’u garante sei mana iha aldeia Sifin no Buqui, kuandu iha aldeia Pune, sei votu tun, tanba ha’u-nia advesáriu kandidatura hosi Pune, maibé ba aldeia rua ne’e ha’u garante,” Tomas Ulan Colo, ba Agência Tatoli, iha sentru votasaun Buqui, segunda ne’e.
Nia argumenta, razaun atu manán iha aldeia Sifin no Buqui, iha eleisaun volta dahuluk, kandidatu iha suku Uistasa’e na’in-neen (6), maibé na’in-haat la konsege tam aba volta daruak.
“Agora tama ba volta daruak, na’in-rua de’it sira kandidatu na’in-haat ne’e, hamutuk ho sira-nia apoiante fó apoia mai ha’u-nia kandidatura, signifika kandidatu na’in-lima inklui ha’u-rasik hasoru kandidatu ida, ne’ebé ha’u garante sei manán,” nia garante.
Nia informa, durante iha faze konsultasaun liuhosi kampañia no door to door ba família bairo no aldeia, programa prioridade maka sei koopera ho programa Governu nian, tanba iha Nonu Governu ne’ebé lidera hosi Primeiru Ministru, Xanana Gusmão, sei mudánsa liga ba podér lokál, no rekruta funsionáriu atu aumenta iha kada suku.
“Ne’ebé bainhira ha’u eleitu-tán ba mandate daruak ne’e, ha’u sei koordena intelektuál sira iha suku no lian-na’in sira, atu hala’o enkontru ofisiál ida, atu deskuti saida mak atu halo iha suku hodi la’o oin, maibé durante ha’u-nia kompromisu ba povu katak, sei ha’u eleitu-tán sei halakon diskriminasaun ba koor polítika, no seluk-tán,” nia promete.
Notísia relevante:Votu lato’o 50%+1, suku sia iha Oé-Cusse avansa ba segunda volta
Entretantu, tuir observasaun Agência Tatoli, sentru voatasaun sira iha suku Usitasa’e hamutuk tolu koloka ba aldeia tolu, Pune, Sifin no Buqui, no hahú votasaun iha tuku 09:00 dadersan sei termina iha tuku 15;00 lorokraik, bainhira laiha eleitór forma iha liña.
Durante realizasaun eleisaun orgaun suku volta daruak ne’e, hetan seguránsa hosi Polísia Nasionál Timor-Leste, no supervisaun hosi Komisaun Nasionál Eleisaun (CNE, sigla portugés) no oberva mos hosi Sekretáriu Tékniku Administrasaun Eleitorál (STAE).
Jornalista: Abílio Elo Nini
Editór:Evaristo Soares Martins
