OÉ-CUSSE, 13 novembru 2023 (TATOLI) – Kandidatu xefe suku Usitasa’e, iha sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), ho númeru sorteiu ida (1), Liberato Punef, promete bainhira eleitu xefe suku Usitasa’e ba mandatu tinan hitu, 2023-2030 sei tau prioridade ba valór kultura no hametin pás iha suku laran.
“Ha’u laiha ambisaun atu manán ka lakon, maibé povu mak sei manán tanba povu mak eskolla, kandidatu ida-ne’ebé maka merese atu lidera ita-nia suku, ohin ita hotu votu ona, orsida kalan ita sei rona rezultadu, semak eleitu, ita hotu hakruk, tan ne’e desizaun povu nian, ita labele fó sala ba malu,” Liberatu Punef, ba Agência Tatoli iha sentru votasaun Pune, segunda ne’e.
Notísia relevante: Ohin, Timor-Leste realiza eleisaun suku segunda ronda
Nia informa, programa ne’ebé kandidatu ne’e prioritiza ba suku, sei esforsa atu servi povu Usitasa’e iha aldeia tolu, aldeia Sifin, Pune no Buqui.
“Primeiru bainhira ha’u eleitu karik, iha mandatu tinan hitu nia laran, persiza hametin kultura iha suku, respeitu kultura suku maka hanesan, tara-bandu ba rikusoin sira iha suku laran, atu labele hetan estragu, hanesan foho sira besik bee-matan sira, ema hotu moris tenki iha dignidade tauk malu, valoriza uma lulik sira, ho produtu tradisionál atu hamoris kultura iha suku, no tau matan ba fronteira suku nian,” nia promete.
Tuir nia bainhira kultura iha suku metin ona, bele kria pas estabilidade iha suku, atu kontribui ba prosesu dezenvolvimentu, halakon diskriminasaun polítika, relijian no seluk-tán.
Liga Governu nian, rekolla ferik no katuas sira bainhira idade tama ona 60 anos, hodi rekomenda no submete sira-nia identidade ba Governu liuhosi Ministériu Solidariedade Sosiál no Inklusaun (MSSI) atu hetan direitu pensaun sosiál, bolsa da mãe, no apoia seluk-tán liga nesesidade suku nian, no sei servisu hamutuk ho Governu ba atendimentu saúde, edukasaun, infraestrura sira seluk ne’ebé Governu harii iha suku laran.
“Buat sira-ne’e, la’os ha’u mak servisu mesak, maibé kada trimestral, sei promove enkontru ho intelektuál no lia-na’in sira iha suku, atu avalia programa no atividade sira-ne’ebé hala’o iha suku laran, nune’e bele hetan sujestaun atu hadi’a karik iha fallansu,” nia promete.
Nia informa, investimentu iha suku Usitasa’e, hanesan merkadu tradisionál Pune, sei hadi’a nia jestaun ba ema hotu atu asesu iha merkadu ne’e, tanba merkadu ne’e hala’o kada semana iha loron kinta, bele koordena didi’ak atu kontribui taxa ba suku ho volume ki’ik.
“Taxa ne’e hahú hosi 0,25 sentavós tama suku, ida-ne’e atu halo saida, uza ba atendimentu suku nian, ezemplu uza ba família balu hetan dezastre ita bele fó apoia urjénsia, bele uza mós atu hadi’a suku laran ba tipu atividade saida de’it, maibé servisu atu tranparánsa kada trimestrál sei informa relatóriu ba públiku atu ema hotu bele hatene,” nia katak.
Notísia relevante:PR Horta iha esperansa xefe suku eleitu serbisu besik liután komunidade
Entretantu, totál eleitór iha suku Usitasa’e hamutuk 2.890 mane 1.470 no feto 1.420 mai hosi aldeia tolu, aldeia Sifin hamutuk 809 mane 420 no feto 389, aldeia Pune hamutuk 1.011 mane 497 no feto 514, aldeia Buqui hamutuk 1.070 mane 553 no feto 517.
Jornalista: Abílio Elo Nini
Editór: Evaristo Soares Martins
