DILI, 13 Novembru 2023 (TATOLI)– Primeiru Ministru, Kay Rala Xanana Gusmão dader ne’e ezerse ona ninia direitu hanesan sidadaun iha Suku Balibar hodi tuir eleisaun Xefe Suku segundu volta nian.
“Ha’u mai iha ne’e hanesan sidadaun hodi ezerse ha’u nia direitu hodi vota no ida ne’e hanesan dever ida mak ha’u mai vota, iha kada eleisaun nu’udar sidadaun iha dever atu ba vota,” PM Xanana dehan iha Sentru Votasaun Aldeia Lacoto, Balibar, segunda ne’e.
Xefe Governu ne’e husu ba kandidatu nain rua ne’ebé kompete ona eleisaun segundu volta atu bele kumpri dever no obrigasaun bainhira eleitu husi komunidade hodi haknaar aan hanesan Xefe Suku Balibar.
“Husu boot se’e deit mak povu Balibar hili bele kumpri nia obrigasaun. Ami mos hili ona Xefe Aldeia no Delegadu sira, no depois sira sei posse. Ami sei halibur malu hodi fo hanoin ba malu atu nune’e servisu ho diak ba no ba Balibar no Lacoto lao ho diak,” nia hateten.
Notisia relevante : PR Horta iha esperansa xefe suku eleitu serbisu besik liután komunidade
Antes ne’e iha Suku Balibar iha kandidatu nain neen (6) mak kompete iha lorom 28 outubru 2023 maibe hafoin eleisaun konsege lori kandidatu nain rua hodi kontinua kompete iha eleisaun segundu ronde mak Gil Yanes da Silva Sores no João Mesquita Soares.
Gil Yanes da Silva Sores hatete prontu hodi kopera ho governu no autoridade munisipal hodi hadia kondisaun suku tuir nia presiza, karik eleitu nu’udar Xefi Suku.
“Bainhira lakon mos ha’u sei nafatin apoiu Xefe suku tanba hau nia vizaun rasik hodi kria paz ba iha suku ida ne’e nune’e joven sira bele sente katak lideransa komunitaria iha hanoin diak hadia Nia suku,” nia esplika.
Balibar hanesan suku ne’ebe lokaliza iha postu administrativu Cristo Rei, munisípiu Dili, kompostu hudi aldeia ha’at mak hanesan Fatu Loda, Lacoto, Lorico no Tancae.
Jornalista : Cidalia Fátima
Editora : Armandina Moniz
