DILI, 13 novembru 2023 (TATOLI) – Xefe Suku eleitu Bemori ba períodu 2023-2030, Francisco Sequeira, promete katak sei tau prioridade ba formasaun no atividade desportiva ba joven sira iha aldeia hitu iha suku refere.
Formasaun da vida ne’e atu kapasita joven sira prepara aan ba futuru nomós prevene sira husi konflitu.
“Programa prioridade ne’ebé ha’u trasa ona maka primeiru, foka ba ita-nian joven sira iha aldeia hitu. Ha’u sei serbisu hamutuk ho xefe aldeia, delegadu no delegada sira atu halo formasaun ruma ba sira hodi hasa’e sira-nian abilidade”, nia dehan iha sentru votasaun Eskola Bázika Filiál Duque de Caxias Bemori, ohin.
Molok atu implementa programa iha aldeia My Friend, Sentru, Has-laran, Ailele-hun, Baba Liurai Oeste, Baba Liurai Leste no 01, sei kria uluk enkontru ho joven sira hodi hato’o programa prioridade sira ne’ebé suku trasa ona, nune’e joven sira bele entende saida mak suku sei halo ba sira.
Tuir nia, programa sira ne’e ninia benefísiu direta ba foinsa’e sira iha kada aldeia. Ne’e duni, nia husu ba sira atu prepara hodi enkaixa aan iha programa refere, tanba Governu ida ne’e iha ona planu ba 2024 no sei tau mós orsamentu ba Ministériu Administrasaun Estatál hodi apoiu subsídiu ba dezenvolvimentu atividade iha suku sira durante tinan hitu nia laran.
“Ha’u hakarak halo ida ne’e atu tulun ita-nian joven sira iha formasaun sira. Depois ha’u sei kria mós atividade desportu ba joven sira, nune’e bele kria pás no estabilidade iha suku nia laran, hamosu filafali unidade entre sira iha kada aldeia”, realsa.
Xefe suku ne’e mós reforsa katak iha mós programa importante seluk mak presiza atu halo durante tinan hitu nia laran maka sei hadi’a kondisaun sede suku Bemori atu sai matak. Nia mós sei reforsa programa Governu nian hodi kontinua apoia ferik no katuas, faluk, defisiente no oan-ki’ak sira atu hetan sira-nian direitu.
Aleinde ne’e, sei tulun mós atividade uma-kreda nian, liuliu programa sira ne’ebé relasiona ho fulan Na’in-Feto no Sagrado Coração de Jesus nian iha suku atu hamoris partisipasaun husi sarani katólika iha suku no aldeia hitu nia laran.
Francisco Sequeira ne’ebé eleitu ho votu konfiansa husi komunidade aldeia hitu hamutuk 941 hodi halakon kandidatu númeru 2, Francisco da Costa Vieira ho votu konfiansa 798 ne’e promete sei serbisu hamutuk ho entidade hotu iha suku nia laran ne’ebé konsidera iha poténsia, nune’e bele dezenvolve di’ak liután suku ne’e.
“Komunidade suku Bemori ninia konfiansa mai ha’u ne’e hanesan responsabilidade ida tan, ne’ebé ha’u sei haka’as aan duni atu serbisu hodi fó filafali konfiansa ne’ebé fó ona mai ha’u durante tinan hitu nia laran. Ha’u sei atende sira iha momentu saida de’it no prontu fasilita sira ho meiu oioin”, promete.
Iha sorin seluk, kandidatu númeru 2, Francisco da Costa Vieira, hatete ida ne’e maka festa demokrasia no iha kompetisaun nia laran tenke iha ida maka avansa. Tanba ne’e laiha manán no lakon, iha de’it maka responsabilidade atu tau-matan ba komunidade sira iha suku Bemori ne’e.
“Hanesan kandidatu ne’ebé seidauk hetan oportunidade, ha’u prontu atu serbisu hamutuk iha tempu saida de’it kuandu xefe suku eleitu presiza ha’u-nian apoiu, tanba suku Bemori ne’e ita hotu nian, ita iha obrigasaun no devér atu kolabora ba malu hodi dezenvolve suku ne’e ba oin”, afirma.
Eleisaun xefe suku Bemori ba segunda volta ne’e nia taxa partisipasaun menus liu kompara ho primeira. Iha eleisaun dahuluk ho totál votante hamutuk 2.179 no segunda volta 1.758.
Husi totál votante ne’ebé ezerse sira-nian direitu ne’e hetan votu válidu hamutuk 1.739 tanba 19 tama iha nulu no branku.
Jornalista: Tomé Amado
Editora: Maria Auxiliadora
