DILI, KAPITÁL

Cobra husu Governu konserva no halo lutu hale’u lagoa Tasi-Tolu

Cobra husu Governu konserva no halo lutu hale’u lagoa Tasi-Tolu

Lagoa Tasi-Tolu nia furak bele sai potensia turistiku. Imajen/Foti husi google.

DILI, 14 novembru 2023 (TATOLI)–Tasi-Tolu iha Dili nia sorin. Tasi fahe-aan ba fatin tolu. Lagoa Tasi-Tolu nanesan pintura ida-ne’ebé Maromak kuda-harii hela iha sidade Dili nia ninin. Tasi-Tolu, sai hanesan fatin istóriku no sítiu turizmu relijiozu ida-ne’ebé sai fatin destinasaun ba turista doméstika no estranjeiru sira atu vizita.

Notisia Relevante: Estátua João Paulo II triste haree Tasi-Tolu nia oin “sabraut”

Horisehik lagoa Tasi-Tolu ne’ebé nalihun-aan iha área protejida Tasi-Tolu ne’e hanesan Dili no Timor-Leste nia “lalehan” ne’ebé nia furak ema ida sei la koko. Horisehik lagoa Tasi-Tolu nalihun-aan mesa-mesak haleu ho foho no nia lolon sira-ne’e mamuk, no ai-horis sira be moris iha foho lolon sira-ne’e halo área Tasi-Tolu sai odamatan lalehan nian ida be furak.

Traballadór sira-ne’ebé Governu kontratu liuhosi kompañia halo hela preparasaun fatin iha área Tasi-Tolu hodi hala’o serimónia tomada pose ba prezidente eleitu períodu 2022-2027, José Ramos Horta, kuarta (27 abríl 2022). Imajen Tatoli/Antonio Daciparu.

Ohin loron, lagoa Tasi-Tolu ne’ebé nalihun-aan ne’e hanesan tiha “bairru foun ida” ne’ebé lagoa ninin no foho lolon sira-ne’e, komunidade ulun-moruk sira konstrui ona uma besik kedas lagoa Tasi-Tolu nia ninin no fohon lolon sira-ne’e nakonu ho uma. Ohin loron, área Tasi-Tolu ne’ebé Governu konserva sai área protejida hela de’it naran no dalaruma hela de’it memória iha loron aban.

Loron ba loron, ema foun sira sempre harii baraka no la kle’ur muda-aan sai uma permanente. Maibé, Governu haree ida-ne’e hanesan fatin divertimentu ida ba ema hosi munisípiu sira diverte-aan hodi konstrui uma nakonu área Tasi-Tolu. Loron ba loron, Governu hetok la fó prioridade iha sira-nia kompromisu, mak área protejida Tasi-Tolu sei sai área ba sidadun sira konstrui uma hosi rohan ba rohan.

Ohin loron, área Tasi-Tolu ne’ebé sai odamatan-boot ba ema estranjeiru hosi Indonézia no sai janela ba mundu ne’e, nakfilak-aan sai odamatan-boot ba timoroan balun tama nadodon hodi konstrui uma iha lagoa ninin no foho lolon sira-ne’e hanesan lia ida la kona sira.

Tasi-Tolu, ohin loron, la’ós ona sai janela ba mundu maibé sai janela ba timoroan sira (liuliu ukun-na’in sira) hodi hafuhu malu, sé mak brani hasee no gusur (demolisaun) komunidade ne’ebé harii uma no baraka iha odamatan-boot no janela [Tasi-Tolu] Timor-nian ne’e.

Horisehik, iha antigu primeiru-Ministru, Taur Matan Ruak, nia ukun ne’e maske inundasaun halo lagoa “Tasi-Tolu” ne’e nakonu ho bee sai lagoa “Tasi-Ida”, maibé la brani halo asaun hodi gusur komunidade hosi Tasi-Tolu [lokaliza iha suku Comoro, postu administrativu Dom Aleixo, munisípiu Dili] ne’e to’o ohin loron.

Karik, ohin loron, IX Governu Konstitusionál ne’ebé lidera hosi Primeiru-Ministru, Kay Rala Xanana Gusmão, ne’e sei fó prioridade hodi gusur (demolisaun) komunidade ne’ebé konstrui uma besik lagoa Tasi-Tolu no harii uma foho lolon halaeu Tasi-Tolu ne’e [se horisehik inundasaun mosu Xanana mak salva komunidade Maslidun no komunidade iha Tasi-Tolu ne’e]?

Ohin loron, haree ba Tasi-Tolu nia oin hahú abraut ona, Antigu Juventude Rezisténsia, Aleixo Cobra, husu IX Governu Konstitusionál atu prezerva fatin istóriku Tasi-Tolu, tanba Tasi-Tolu ne’e hanesan fatin istórika ba iha luta libertasaun nasionál no fatin Papa João Paulo II halo misa pontifice bainhira Papa João Paulo II mai vizita Timor-Leste iha 12 outubru 1989.

Aleixo Cobra sujere ba Governu atu kria regra no halo moru haleu área Tasi-Tolu, atu nune’e populasaun labele aproveita hodi halo uma iha área protejida refere, no populasaun sira labele faan sasán iha laran. Ida-ne’e, tuir nia, hatudu imajen laduun di’ak tanba Tasi-Tolu ne’e odamatan boot ne’ebé ema estranjeiru sira tama no sai. Nune’e, nia hsu atensaun ba ema hotu no husu Governu atu konserva Tasi-Tolu nia valór istóriku iha loron horisehik nian, ohin nian no loron aban nian.

Situasaun atuál negosiante sira faan sasán iha área Tasi-Tolu, segunda (16/10). Imajen Tatoli/Francisco Sony.

“Governu tenke fó atensaun ba fatin istóriku Tasi-Tolu. Governu nia polítika ida mak servisu hamutuk ho igreja oinsá atu konserva Tasi-Tolu. Fatin barak mak sai fatin istórika maibé Governu no populasaun uza tiha ba buat seluk fali,” Antigu juventude rezisténsia, Aleixo Cobra, hateten ba Agência Tatoli liuhosi programa “Entrevista Eskluziva” ho topiku “Reflesaun Vizita Papa João Paulo II Mai Timor Lorosa’e” iha estúdiu Faról, sesta (13 outubru 2023).

Baibain ema estranjeiru sira husu fatin Papa João Paulo II nia fatin vizita iha Timor-Leste ne’e iha ne’ebé, nia dehan, iha Tasi-Tolu maibé ema mai haree fatin ne’e sai fatin negosiante sira faan sasán, fatin para karreta no fatin soe lixu ne’e hatudu imajen laduun furak.

“Ha’u triste tanba binhira it aba rai-li’ur mak ema ema husu fatin vizita papa nian iha ne’ebé, maibé ita dehan iha Tasi-Tolu mak Governu la konserva ne’e, ita sente ladún furak. Tanba, ita dehan área protejida no sítiu turístiku relijiozu mak nakonu fali ho komunidade nia uma ne’e, susar tebes,” nia dehan.

Hosi uma ba uma ne’ebé komunidade konstrui iha Tasi-Tolu ne’e, dalaruma komunidade sira konstrui iha tempu kalan de’it, tanba tauk karik sira konstrui iha rai loron ne’e autoridade sira impede, Nune’e no nune’e ba beibeik, to’o beibeik ba beibeik ne’e, la sente Tasi-Tolu nakonu ona ho uma no to’o lagoa Tasi-Tolu nia ninin sira-ne’e orna de’it ona komunidade nia uma.

“Tuir baze legal, bainhira atu halo uma, presizamente tenke iha lisensa ba konstrusaun kark tenke liuhosi MInsitériu Obra Públika (MOP) no Terra no Propriedade. Bainhira ita haree iha rai loron hela ne’e, rai ne’e mamuk hela maibé kalan sira konstrui uma no rai bainhira loron ona neé, uma ne’e mós hamriik ona. Entaun, ita haree ba situasaun sira-ne’e obriga,” Abitante Tasi-Tolu, Placido Marcal, hateten ba Agência Tatoli iha Tasi-Tolu, foin lalais ne’e.

Atu halo área Tasi-Tolu hanesan area protejida ne’e sai “Jardin ba Nasaun” no konserva fatin istóriku ida-ne’e sai matak no buras ba nafatin ne’e, maibé bainhira Governu liuhosi ministrériu relevante mak la mobiliza komunidade labele halo uma iha Tasi-Tolu ne’e, maka iha loron aban Tasi-Tolu sei lakon nia furak.

Ambiente Tasi Tolu Dili, tersa (10/10). Imajen Tatoli/Anito Soares

“Agora, ita haree área protejida Tasi-Tolu ne’e nia kondisaun la verde ona maibé sai fali kór kafér ka cokolate. Nune’e ministériu relevante fó orientasaun ba autoridade lokál suku Comoro, nune’e bele mobiliza komunidade bele hadi’a área Tasi-Tolu sai verde no sai sítiu turístiku relijiozu no sai fatin istóriku ne’ebé bele dala turista estranjeiru bele mai vizita,” nia dehan.

Planu atu gusur komunidade ne’ebé konstrui uma iha lagoa Tasi-Tolu nia ninin no iha foto lolon Tasi-Tolu hirak ne’e mosu ona iha tinan ba kotuk, maibé ministériu implementadór mak tenke implementa buat hireak ne’e no líder komunitáriu pronto atu halo sensibilizaun.

“Xefe suku ne’tuir norma baibain ne’e sempre kumpre orientassun hosi leten maibé diploma ministerial seidauk tun mai. Poder lokál laiha maibé iha Dekretu-Lei númeru 09/2013, hakerek hotu sasán sira ne’e. Agora, ha’u ne’e hein de’it orientasaun hosi ministériu tanba programa ne’emai hosi Governu,” Xefe suku Comoro, Eurico Costa, hateten ba Agência Tatoli, foin lalais ne’e.

Antes ne’e, administradór postu administrativu Dom Aleixo, munisípiu Dili, José de Jesus, husu ba abitante ne’ebé okupa área protejida Tasi-Tolu presiza iha konxiénsia no koordena ho autoridade komunitária no husik fatin ne’e mamuk, tanba Governu iha polítika no planu atu halo dezenvolvimentu.

“Husu ba abitante sira-ne’ebé okupa hela rai protejida atu uza konxiénsia no presiza koordena ho autoridade komunitária no autoridade kompetente, nune’e dixiplina iha sidade Dili inklui Tasi-Tolu ne’e. Pelumenus hatene tuir bá, ida-ne’ebé mak rai Estadu, fatin pretejida no fatin turizmu sira. Tanba iha ne’ebá, Governu planeia atu konstrui Hotel Paradise Estrela lima iha ne’ebá no sei halo haleu área ne’ebá hahú hosi Masin Lidun nian,” Administradór postu administrativu Dom Aleixo, José de Jesus, hateten ba Agência Tatoli iha Administrasaun Munisipál Dili, kinta (14 setembru 2023) ne’e.

Área protejida hanesan Tasi-Tolu, nia hateten, Estadu bandu atu abitante konstrui uma hodi hela bá, maibé saida mak hatudu no haree realidade populasaun laiha konxiénsia hodi halo baraka kiik-oan, no bainhira Governu la hasee mak neineik ba neineeik, hosi baraka ne’e sei konstrui fali uma permanente ida hodi hela bá.

“Maibé, autoridade munisípiu Dili kontinua observa no aviza. Iha-ne’eba ne’e ita haree kuaze nakonu, aldeia de’it okupa ona espasu hosi xefe família nian. Governu iha ona polítika atu kria kondisaun ba sira maibé ida-ne’e seidauk to’o, maibé kuandu nafatin la kontribui ba dezenvolvimentu ita-nia rain, la’ós loro-loron mak autoridade komunitária avizu hela de’it,” nia dehan.

Tuir loloos, nia hateten, lagoa Tasi-Tolu hanesan zona protejida no fatin istóriku ida hodi prezerva istória ba parke nasionál nian, tanba fatin ne’e uluk Amu Papa João Paulo II prezide misa bainhira mai vizita Timor-Leste (=Timor Timur) iha tempu okupasaun Indonézia iha 12 outubru 1989, maibé komunidade falta konxiénsia no hahú harii uma iha área protejida refere.

“Ida-ne’e, ha’u proekupa tebes no husu atu labele hela iha fatin (Tasi-Tolu) ne’e, husik mamuk no Governu ida-ne’e bele halo dezenvolvimentu no sai fatin turizmu iha ita-nia rain,” nia hateten.

Área protejida Tasi-Tolu ne’e Terras Propriedade mak hatene

Prezidente Autoridade Munisípiu Dili (AMD), Guilhermina Filomena Saldanha Ribeiro, komunidade ne’ebé konstrui uma iha área protejida Tasi-Tolu ne’ebá ne’e Governu mak hatene la’ós autoridade munisípiu Dili mak deside, tanba estatutu rai Tasi-Tolu ne’e Dirasaun Terras no Propriedade mak hatene.

Ambiente Tasi-Tolu Dili, tersa (10/10). Imajen Tatoli/Anito Soares

“Agora komunidade ne’ebé mak hela iha área protejida Tasi-Tolu ne’ebá ne’e Governu mak deside la’ós munisípiu Dili. Iha estatutu rai Tasi-Tolu ne’e Terras Propriedade mak hatene. Maibé, ita hotu hatene katak Dili dezorganizadu antes ona ne’e susar atu rezolve,” nia dehan ba Agência Tatoli, iha serimónia entrega asesora Dezenvolvimentu Munisípiu Dili hosi programa PARTISIPA, iha salaun AMD, Matadoru, tersa (23 juñu 2023) ne’e.

Maibé, nia dehan, hosi kestaun sira-ne’e komunidade mak tenke hatene fatin ida-ne’ebé mak nia bele halo uma no fatin ne’ebé mak labele halo uma. Presiza hatene ida-ne’e, tanba ne’e presiza komunidade mós tenke kontribui ba dezenvolvimentu liuliu área protejida ba nasaun ida-nian.

“Ida-ne’e mak dezafiu ida-ne’ebé Governu hasoru no ami-nia parte mak dehan labale halo uma iha área protejida no iha área risku sira tanba dezastre maibé kontinua halo iha fatin sira-ne’e. Ita bele dehan komunidade ne’e ita labele fera nia ulun ona,” nia dehan.

Deputadu CNRT husu Governu kontrola komunidade harii uma iha Tasi-Tolu

Deputadu hosi bankada Congresso Nacional de Reconstrução Timorense (CNRT), Marcos Xavier, husu Governu presiza kontrola komunidade balun ne’ebé faan sasan besik tasi ibun no  harii baraka to’o ikus mai sai falu uma mea-parede iha Tasi-Tolu.

Kondisaun iha Masin Lidun, Lagoa Tasi-Tolu, segunda (19/04). Imajen TATOLI/António Gonçalves.

“Liga ho kampaña parlametár ne’ebé hahú iha 19 abríl, ha’u haree iha Tasi-Tolu, ita-nia komunidade sira-ne’ebé faan sasán iha tasi ibun sira-ne’e. Primeiru sira halo de’it baraka oan, maibé agora sira komesa halo ona uma mea-parede,” Deputadu Marcos Xavier levanta kestaun ne’e liuhosi reuniaun plenária PN, tersa (25 abríl 2023) ne’e.

Kestaun ida-ne’e, nia husu ba Prezidente Autoridade Munisípiu Dili ho Ministéiru Administrasaun Estatál (MAE) atu kontrola sidadaun sira-ne’ebé hela iha Dili, liuliu komunidade ne’ebé hela iha Tasi-Tolu.

Tasi-Tolu la’ós zona ba komunidade atu hela

Tuir Ajénsia Planeamentu Munisípiu Dili haktuir, tuir loloos lagoa Tasi-Tolu hanesan zona protejida no fatin istóriku hodi prezerva istória ba parke nasionál nian, tanba fatin ne’e uluk Amu Papa João Paulo II hodi selebra misa no la’ós zona atu komunidade hela ba.

“Zona Tasi-Tolu, primeiru ita haree komunidade hela ne’eba ne’e estraga ona ambiente ne’ebé mak sai hanesan área protejida. Fatin ne’ebá ne’e ita indika katak uluk Amu Papa João Paulo II mai iha Timor-Leste iha 12 outubru 1989. Tuir loloos, fatin ne’e ita konserva sai fatin istóriku ka parke nasionál nian ida,” Diretora Ajénsia Planeamentu Munisípiu Dili, Emeliana Soares, Agência TATOLI iha nia kna’ar fatin Matadoru, Dili, kinta (07 agostu 2020).

Tuir loloos, nia dehan, ne’e parte Terras no Propriedade mak iha kompeténsia atu bolu atensaun ba komunidade ne’ebé hela iha Tasi-Tolu, no sira mós tenke avizu ba komunidade katak fatin ne’e área protejida, no ema labele hela iha Tasi-Tolu.

Governu husu labele okupa área protejida

Tanba ne’e, Governu liuhosi Sekretáriu Estadu Terras no Propriedade (SETP), Mario Ximenes, husu ba komunidade iha kapitál Dili atu labele kontinua okupa rai estadu hodi harii uma, liuliu área protejida.

Komunidade  konstrui uma iha Lagoa Tasi-Tolu nia ninin.  Imajen Tatoli/Osória A. Marques.

Nia hasai apelu ne’e relasiona ho númeru okupante ne’ebé aumenta beibeik hodi okupa rai Estadu iha área protejida sira hanesan iha Lagoa Tasi-Tolu ho area João Paulo II, tasi ibun no mota ninin.

“Husu komunidade atu labele konstroi uma arbiru iha fatin ne’ebé kategoria ba domíniu públiku,” Sekretáriu Estadu Mario Ximenes, hateten ba Agência Tatoli iha 23 agostu 2019, iha Palásiu Governu, Dili.

Área protejida iha área Tasi-Tolu ninian, tuir planu VIII Governu Konstitusionál ne’ebé lidera hosi Primeiru-Ministru, Taur Matan Ruak, sei dezenvolve Tasi-Tolu sai fatin turizmu, tanba ne’e nia parte reprezenta Governu husu ba komunidade atu fó kontribuisaun hodi evita okupa área protejida Tasi-Tolu.

Nakait ba asuntu ne’e, Dirasaun Nasionál Terras no Propriedade (DNTP), Ministériu Justisa, sei toma atensaun ba komunidade ne’ebé halo uma no okupa rai iha área protejidu iha Lagoa Tasi-Tolu, Dili.

Diretór Nasional DNTP, Francisco R. Borges, hateten okupante ne’ebé mak kontinua halo uma nakonu iha rai estadu hanesan iha Tasi-Tolu, bairru João Paulo II sei toma atensaun atu lalika halo uma iha área protejidu.

“DNTP hein hela Sistema Nasionál Kadastru (SNC-sigla portugés) ne’ebé mak halo hela levantamentu dadus kona-ba rejistu totál rai iha Dili laran hotu no fó sai ona rezultadu hotu mak tempu besik PNTP sei halo identifikasaun iha terrenu hodi haree kona-ba rai hotu ne’ebé mak pertense ba Estadu,” Francisco R. Borges hateten ba Agência Tatoli iha nia kna’ar fatin, Bebora.  kinta (22 agostu 2019).

Hatán kona ba populasaun ne’ebé mak halo uma sein koñesimentu hosi Estadu no kontinua okupa rai Estadu iha Tasi-Tolu, Francisco Borges hateten, ministériu relevante sira hanesan Ministériu Obra Públika, Meiu Ambiente no Estadu, Ministériu Justisa liuhosi Sekretária Terras no Propriedade tenke servisu hamutuk atu haree ba kestaun ne’e.

Impaktu hosi komunidade okupa área protejida Tasi-Tolu, to’o konstrui uma iha lagoa Tasi-Tolu nia ninin no harii uma iha foho lolon haleu Tasi-Tolu ne’e [iha VIII Governu Konstitusionál ne’ebé lidera hosi Primeiru-Ministru Taur Matan Ruak], mak iha domingu (04 abríl 2021) akontese udan boot hamosu inundasaun ne’ebé halo tasi fahe-aan ba fatin tolu ne’e sai ida de’it.

Lider Karismátiku, Kay Rala Xanana Gusmão, tun ba lagoa laran hodi ajuda tékniku sira monta bomba no lori mangeira hasai bee iha Lagoa Tasi Tolu, hodi salva komunidade sira hosi dezastre inundasaun. Imajen Tatoli/Eugénio Pereira.

Maske la hola parte iha ezekutivu maibé líder karismátiku Kay Rala Xanana Gusmão esforsu makaas hodi salva povu sira hela iha área protejida Tasi-Tolu hosi inundasaun. Nune’e, iha sábadu (10 abríl 2021), Xanana mobiliza kmpañia internasionál WIKA, Incanto Weste no Timor Port monta bomba bee lima ho mangeira hasai bee iha lagoa Tasi-Tolu ba tasi laran.

Antes atu xupa sai bee iha lagoa tasi-Tolu ne’e, iha sesta (09 abríl 2023), Xanana Gusmão hamitik ho lia-na’in Tasi-Tolu nian halo rituál hamoos dalan atu bele haloos bee-dalan Lagoa Tasi-Tolu ho loloos atu hamenus inundasaun.

Serimónia rituál ne’e halo hosi lia-na’in Tasi-Tolu, husu lisensa ba forsa natureza nia kbiit ho dadolin lian Tokodede hodi look bua no malus, no oho bibi ida selebra iha foho leten área Fatu-Banco, Bairru Maria Auxiliadora.

Abílio da Costa “Tasirade” nu’udar lia-na’in Tasi-Tolu, uma-lisan Malalu, Dili, haree iha bibi-aten hatudu sinál di’ak hodi fó lisensa atu bele xupa bee sai hosi lagoa Tasi-Tolu hodi hamenus volume bee la’o tuir nia dalan.

“Sinál na’an-aten hatudu di’ak, mais sei lori tempu bele xupa de’it bee sai,” Abílio da Costa “Tasirade” hateten.

Rituál ne’e, alende husu lisensa ba forsa natureza, lia-na’in sira mós hamulak bei’ala tolu ne’ebé sai na’in ba Lagoa Tasi-Tolu atu hakmatek hodi labele fó risku ba komunidade.

“Objetivu rituál ida tan maka ita husu Avó Lafahek tolu ne’ebé mai iha Tasi-Tolu ne’e bele hakmatek hodi la bele fó risku ba nia beioan sira-ne’ebé hela iha Lagoa nia ninin,” nia hateten.

Se iha inundasaun, Kay Rala Xanana Gusmão hamutuk ho lia-na’in Tasi-Tolu halo serimónia rituál husu ba avó Lafaek tolu (3) ne’ebé hein lagoa Tasi-Tolu ne’e atu haloos bee-dalan, karik Xanana Gusmão [XI Governu Konstitusionál] sei hamutuk ho lia-na’in Tasi-Tolu halo serimónia rituál ida tan atu hamamuk área protejida Tasi-Tolu hodi hasai okupante sira-ne’ebé konstrui uma iha Lagoa Tasi-Tolu nia ninin no harii uma iha foho lolon hale’u Tasi-Tolu?

Notisia Relevante: Xanana akompaña rituál hatuur bee-dalan Lagoa Tasi-Tolu

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!