iklan

HEADLINE, KAPITÁL

Diretór BTL, E.P husu populasaun poupa no jere utilizasaun bee

Diretór BTL, E.P husu populasaun poupa no jere utilizasaun bee

Diretór Operasionál no Manutensaun BTL, E.P, Aleixo dos Santos. Imajen Tatoli/Francisco Sony

DILI, 14 novembru 2023 (TATOLI)—Diretór Operasionál no Manutensaun Bee Timor-Leste, Empreza Públika (BTL, E.P) , Aleixo dos Santos, husu ba populasaun iha territóriu tomak hodi bele poupa no jere utilizasaun bee ho di’ak nune’e ema hotu bele asesu bee.

“Ita husu atubele kolabora no fó kontribuisaun hodi jere no poupa bee tamba ita uza enerjia no bomba mak bee ne’e mai hodi bele konsume,” Diretór hateten ba Agência Tatoli, iha ninia knaar fatin, Caicoli, tersa ne’e.

BTL, E.P halo gastu $2.000 to’o $5.000 ba enerjia elétrika mensalmente ba kada bomba bee perfurasaun hamutuk 27 iha kapitál hodi prodús no fornese bee ba estasaun iha kapitál hodi distribui ba populasaun. Nune’e kada fulan gasta hamutuk $135.000.

“Ida-ne’e gastu ba enerjia elétrika hodi bele dada bee hosi rai okos. Ita uza enerjia no bomba mak fornese bee ba populasaun,” nia akresenta.

Notísia relevante : Janeiru-setembru: BTL, E.P monta ona kontadór bee 800-resin iha kapitál Dili

Durante ne’e distribuisaun bee ba iha populasaun la’o durante 12 oras loroloron no balun to’o 24 oras hanesan iha Markoni no Kuluhun.

Enkuantu, durante ne’e sempre halo reparasaun ba mákina no bomba hodi halo observasaun no limpeza hodi bele prodús bee hosi rai okos.

“Ita halo reparasaun tinan-rua ka lima dala-ida maibé tuir loloos tinan-ida dala-ida,” Aleixo dos Santos, tenik.

Nune’e, Diretór ne’e konklui katak reseita ne’ebé BTL, E.P hetan hosi kliente ba distribuisaun bee seidauk korresponde tanba kobre entre $90.000 to’o $135.000, depende ba utilizasaun.

Jornalista     : Jesuína Xavier

Editora          : Julia Chatarina

iklan
iklan

Leave a Reply

iklan
error: Content is protected !!