DILI, 14 novembru 2023 (TATOLI) – Institutu Nasionál Formasaun Dosente no Profisionál Edukasaun (INFORDEPE) serbisu hamutuk ho Southeast Asian Ministers of Education Organization (SEAMEO) hodi disponibiliza formasaun ba formadór timoroan 50 kona-ba utiliza aplikasaun internét.
Vise-Prezidente INFORDEPE ba Asuntu Formasaun Profisionál no Kontínua, Verónica Moreira Correia, dehan formasaun nu’udar kontinuasaun ida husi programa sira ne’ebé maka antes ne’e Ministériu Edukasaun (ME), liuhusi INFORDEPE halo ona ho SEAMEO. Formasaun ne’e tama ona ba faze datoluk kona-ba oinsá utiliza aplikasaun sira iha internét hodi dezenvolve rekursu didátiku sira ho modalidade ne’ebé adekuada.
INFORDEPE nia planu ba tinan oin hakarak integra teknolojia iha formasaun pilotu liuhusi kursu online ka offline. Formasaun ne’e sei implementa ba iha nivel eskolaridade husi ensinu báziku terseiru síkulu no sekundáriu nian.
“Formasaun ida ne’e rasik ita implementa ba formadór nasionál no munisipál sira ne’ebé mai husi INFORDEPE. Objetivu husi formasaun ne’e rasik maka atu prepara sira ba iha futuru, liuliu oinsá atu utiliza teknolojia ba iha formasaun”, Verónica Correia afima ba Tatoli iha Beach Garden, ohin.
Formasaun durante loron haat, entre 14 no 17 novembru, ba formadór sira ne’e bainhira fila bá sira-nian knaar fatin bele implementa saida maka sira hetan ona sobre utilizasaun teknolojia ba formadór sira seluk iha nasionál nomós iha munisípiu.
“Ita-nian formadór na’in-50 ne’ebé tuir hela formasaun ne’e kompostu husi nasionál 24 no munisípiu iha kazuál 26”, dehan.
Lembra katak formasaun ne’ebé disponibiliza husi INFORDEPE ho SEAMEO ba timoroan na’in-50 ne’e kontinuasaun husi programa ne’ebé hala’o ona iha 2014 no 2018. Treinamentu konjunta ida ne’e atu kapasita profesór timoroan sira, nune’e bele iha koñesimentu tékniku no iha futuru bainhira instala liña internét iha kada eskola, sira bele implementa tuir matéria sira ne’ebé maka hetan ona.
Formasaun iha 2014 ba de’it profesór 50 ne’ebé hanorin iha dixiplina siénsia no matemátika iha síkulu tolu. Iha 2018, ba profesór 50 husi eskola sekundária ne’ebé hanorin siénsia ezata no matemátika.
“Formasaun ne’ebé halo ona ba profesór husi nivel eskolaridade rua iha 2014 no 2018 ne’e ninia konteúdu hanesan de’it kona-ba formasaun téknika edukasaun bázika”, konta.
Notísia relevante: ME husu Prezidente foun INFORDEPE kria modelu formasaun distánsia ba profesór sira
Jornalista: Tomé Amado
Editora: Maria Auxiliadora
