DILI, 16 novembru 2023 (TATOLI) – Estudante finalista 113 iha territóriu realiza ezame segunda xamada iha loron 20 novembru hafoin Inspesaun Jerál Ministériu Edukasaun (ME) autoriza.
Koordenadór Gabinete Unidade Kurríkulu Nasionál, João Maupelu, esplika katak loloos ne’e ezame realiza ona iha loron 06 liubá, maibé data tentativa ne’e hetan intervensaun husi parte Inspesaun Jerál, tanba ne’e adia fali ba semana oin. Intrvensaun Inspesaun Jerál nian ba prosesu ezame ne’e tanba hein hela alunu 137 ne’ebé antes ne’e la hatama diploma orijinál.
“Ita simu ona orientasaun katak data fiksu atu realiza ezame segunda xamada ne’e sei akontese iha loron 20 agora”, João Maupelu reitera iha Vila Verde, ohin.
Nia dehan estudante finalista 113 ne’ebé hetan oportunidade atu tuir fali ezame ne’e husi eskola bázika terseiru síkulu hamutuk 33, sekundária 69 no tékniku vokasionál 11.
Tuir planu, realizasaun ezame sei hala’o de’it iha kada Servisu Edukasaun Munisipál no Dili hala’o iha Ministériu Edukasaun iha Unidade Kurrikulu Nasionál nian fatin.
“Ba estudante na’in-139 ne’ebé komete hela kazu no tuir informasaun, foin iha estudante na’in-11 maka submete ona sira-nian dokumentu. Kuandu dokumentu sira ne’e maka depois Inspesaun Jerál verifika maka laiha problema, odamatan sei nakloke ba sira atu tuir mós ezame segunda xamada”, adianta.
Diretór Servisu Edukasaun Munisípiu Dili, Carlito da Silva, antes ne’e informa ona katak estudante na’in-137 ne’ebé laiha diploma orijinál ne’e barak liu mai husi Eskola Sekundária Jerál FINANTIL hamutuk 105, maibé iha na’in-tolu mak submete ona sira-nian dokumentu no husi Eskola Sekundária Nobel da Paz na’in-10, ualu mak hatama ona dokumentu.
Notísia relevante: Estudante finalista 113 sei realiza ezame segunda xamada
Jornalista: Tomé Amado
Editora: Maria Auxiliadora
